Qalalyq Bilim basqarmasynyń basshysy Sholpan Qadyrova búgin ákimdikte ótken brıfıngte bilim ordalarynyń oqýshylary men stýdentterine qashyqtan oqytýdy uıymdastyrý men ótkizý máseleleri boıynsha Bilim basqarmasynyń janynan front-keńse qurylǵanyn, ár mektepte qashyqtan oqytý boıynsha úılestirýshi taǵaıyndalǵanyn jáne call-ortalyq qosylǵanyn aıtty.
«16 naýryzdan bastap bizdiń JOO men kolledjder qashyqtan oqytý formasyna kóshti. Jumys tolyqtaı rettelgen dep aıtýǵa bolady. Stýdentterdiń barlyǵy qajetti oqýlyqtarmen, ádistemelik quraldarmen qamtamasyz etildi. 6 sáýirden bastap Nur-Sultan qalasynyń mektepteri qashyqtan oqytý formasyna kóshedi. Qashyqtan oqytýdy uıymdastyrý jáne júrgizý jumystaryn úılestirý úshin ár mektepte tehnıkalyq koordınator taǵaıyndaldy. Olar 6 sáýirden bastap oqýshylar, ata-analar, muǵalimder tarapynan tehnıkalyq jaǵdaıǵa qatysty túsetin saýaldardy qabyldaıtyn bolady», – dep túsindirdi basqarma basshysy.
Qadyrovanyń aıtýynsha, qalada kompıýteri joq 6500 bala (4594 otbasy), ınternet jelisine qosylý múmkindigi joq 5583 bala (5108 otbasy) anyqtalǵan.
«Biz oqýshylarymyzdyń kompıýterlik tehnıkamen qanshalyqty qamtylǵandyǵyn, olardyń ınternet jelisine kirý múmkindigi bar-joǵyn baqyladyq. Sáıkesinshe osy sanattaǵy oqýshylardyń 95% qajetti tehnıkamen qamtydyq. Qalǵan oqýshylarǵa kompıýterler 5 sáýirge deıin beriletin bolady. Budan qosa, tórtinshi toqsan bastalǵanǵa deıin ınternet jelisine kirýge múmkindigi joq otbasylardy ǵalamtorǵa qosatyn bolamyz. Internet jelisine qosý máselesin "Qazaqtelekom" AQ jáne basqa baılanys operatorlarymen birlesip sheship jatyrmyz. Sondaı-aq, mundaı kómekti biz keıbir muǵalimderimizge de kórsettik. Ǵalamtorǵa qosylmaǵandaryn fleshkartamen qamtamasyz ettik», – dedi Sh. Qadyrova.
Aıta keteıik, búgin mektepterde synama sabaqtary ótkizildi. 2 sáýir kúni qashyqtyqtan oqytý úderisin júzege asyrýdy ata-analarǵa túsindirý maqsatynda ata-analar jınalysy ótedi. 3 sáýir kúni barlyq mektepterde qashyqtan oqytý formatyn túsindirý maqsatynda biryńǵaı synyp saǵaty uıymdastyrylady.
