Olardyń suraqtaryna jaýap bergen qala ákimi Bolat Jumabekov qazirgi jaǵdaıdyń adam qoǵamyndaǵy ómir súrý standarttaryna kelmeı jatqanyn atap kórsetti.
«Sondyqtan biz de jańa jaǵdaıǵa ıkemdelý boıynsha túrli sharalardy qolma-qol qarastyrýǵa tyrysýdamyz. Mysaly, buryn bizdiń qalamyzda dári-dármekti túnde satatyn bir-aq dárihana jumys isteıtin. Endi túnde qysylǵan adamdar qalany kezip, alysqa júrmes úshin ondaıdyń taǵy birnesheýin ashýdy da oılap otyrmyz. Qazir qoǵamdyq kóliktiń júrýine tıym salyndy. Sondyqtan asa qajetti mamandaryn qyzmet basyna jetkizý mindeti jumys berýshi ózine júkteledi. Sondaı-aq kommýnaldyq tólem qaǵazdardy kópqabatty úılerdiń poshta jáshikterine jetkizetin qyzmetkerdiń de júrisin azaıtý joldaryn qarastyrýdamyz», - dedi ol kommýnıkasııalyq qyzmet ortalyǵynda bergen brıfınginde.
Ákim budan basqa da ondaǵan suraqqa jaýap berdi.
Oblystyq Polısııa departamenti bastyǵynyń orynbasary, polısııa polkovnıgi Qanat Aıtbaev ta ózine qatysty suraqtarǵa jaýap berdi. Onyń aıtýyna qaraǵanda, qazir oblys aýmaǵynda Petropavlǵa kiretin jáne shyǵatyn joldarda 5, aýdandarda 25 blok-beketter jumys istep tur. Olar karantın rejimin qatty talap etýde dedi polkovnık.
Osyndaı jaǵdaıda bir kekesin de ezýińe úıirile qalady. «Aıtpasa sózdiń atasy óledi» degendeı ony da jasyra almadyq. Bizdiń sheneýnikter bireýdiń qańsyǵyn tańsyq qylýǵa da jyldam-aý. Qazirgi standartsyz jaǵdaıǵa «non-stop» rejimi» degen at tańyp alypty. Odan da ana tilimizde: «Abaıla – ajal qasyńyzda!» dese qandaı uǵynyqty bolar edi, dep oılaımyz... Degenmen qyzmetterdiń óz mindetterine adaldyq tanytyp jatqanyna rıza bolasyń.
Soltústik Qazaqstan oblysy
