О́ńir dıqandary jyldan-jylǵa tyńaıtqysh qoldanýdy da arttyryp otyr. Jer jaryqtyqtyń qunary jyldan-jylǵa azaıyp barady, tek tyńaıtqysh qana onyń nárin arttyrady. Sondyqtan dıqannyń tyńaıtqysh alýǵa degen suranysy óse túsýde. Memleket sharýanyń talabyn qoldap otyr, bıyl bul jumysqa 5,5 mlrd teńge sýbsıdııa qarastyrylǵan. Byltyrǵymen salystyrǵanda bul 1 mlrd teńgege artyq. Sýbsıdııa túrli zııankesterdi qurtýǵa da beriledi. Oblys ákimi Qumar Aqsaqalov 2022 jyldan bastap pestısıd pen gerbısıdke beriletin sýbsıdııa 11 mlrd teńgege deıin artatynyn jetkizdi.
«Bizdiń usynysymyzdy Memleket basshysy qoldap, sýbsıdııa kólemin arttyrýǵa qol jetkizip otyrmyz. Ony tıimdi paıdalaný – bizdiń mindet. Sondyqtan sapaly hımıkattar tabý kerek. Arzan dep usynylǵan keıbiriniń paıdasy joq, bul tek aqshany jelge shashý. Bul boıynsha Aýyl sharýashylyǵy mınıstrligimen de kelisý kerek», dedi óńir basshysy Q.Aqsaqalov.
Dıqannyń zárý máselesiniń biri – ozyq tehnıka. Qazirgi tehnıkanyń kóbi eskirgen. Jaqyn shetelderden keletin tehnıka sapasyz, jıi aýystyrýǵa týra keledi. Sondyqtan kiris-shyǵysyn esepteýge mamandanyp alǵan dıqandar memlekettiń kúshimen barynsha sapaly, birneshe jyl boıy tıimdi jumys isteı alatyn alys shetelderdiń ozyq tehnologııaly tehnıkalaryn alýǵa qushtar. Osy oraıda oblys 2 myń dana jańa tehnıka satyp almaq. Oǵan memlekettik bıýdjetten 40 mlrd teńge qarastyrylyp otyr. Atalǵan qarajat tıimdi jumsalsa, dıqandar mashına-traktor parkin birshama jańartyp almaq.
Bıylǵy kóktemgi dala jumystaryna barlyǵy 13,7 myń traktor, 16 myń tuqym sepkish, sondaı-aq joǵary sapaly 1,2 myń sebý keshenderi daıyn. Sonyń ishinde, jyl basynan 5,3 mlrd teńgege satyp alynǵan jańa tehnıkalar da bar. Oblys basshysynyń aıtýynsha, soltústikqazaqstandyqtar byltyr 1897 birlik jańa tehnıka satyp alyp, mashına-tehnıka parkin 3 paıyzǵa jańartqan. Osy kórsetkishti jyl saıyn 6 paıyzǵa jetkizý kózdelip otyr. Sonymen birge qosalqy bólshekter jetkizýdi tıimdi uıymdastyra bilgen jón. Qazir eń qajetti degen bólshekterdiń tizilimderi jasalyp, saýda oryndaryna jetkizilgen. Sharýa qala kóshelerinde izdep júrmes úshin bólshek saýda dúkenderi shahardyń kireberisterine ornalastyryldy. Olar shekteý sharalaryna qaramaı, úzilissiz jumys isteıtin bolady. О́ńir basshysy aýdan ákimderiniń bul iske jiti qarap, sharýanyń qajettilikterin bilip otyrýy keregin eskertti.
Soltústik Qazaqstan oblysy
