Reseılik jýrnalısterdiń habarlaýynsha, Belarýs mamany jaqyn ýaqytta Iаroslavldiń «Lokomotıv» klýbyna basshylyq etpek. Sondaı-aq klýb osy aptada ony bas jattyqtyrýshy retinde resmı tanystyrady. Bir aıta keterligi, Andreı Skabelka úshin «Lokomotıv» beıtanys komanda emes. О́z kezeginde Skabelka Iаroslavl komandasy sapynda úsh jyl qatarynan óner kórsetip, 1997 jyly Reseı chempıony atanǵan.
Sondaı-aq Skabelkamen birge «Lokomotıv» sapyna «Barystyń» eki birdeı úzdik oıynshysy – qorǵaýshy Atte Ohtamaa men qaqpashy Eddı Paskýale de aýysýy múmkin. Eki hokkeıshiniń de «Baryspen» kelisimsharty 30 sáýirde aıaqtalady.
Aıta keteıik, 6 sáýir kúni elordanyń «Barys» komandasy Andreı Skabelka qyzmetinen ketkenin jáne jańa bas jattyqtyrýshy izdep jatqanyn habarlaǵan bolatyn. Skabelkanyń klýbtan ketýiniń basty sebebi – eki tarap eńbek kelisimshartyn sozýǵa kelise almaǵan.
«Barys» Belarýs mamanymen eki ret Gagarın kýbogynyń ekinshi pleı-off kezeńine shyqqan-dy. Sondaı-aq bıylǵy QHL básekesiniń Shyǵys konferensııasynda ekinshi oryn ıelendi.
