Maqala Elbasymyzdyń, halyqpen qashanda birge ekenin kórsetedi jáne úlken senim beredi. Elimizdiń syndarly saıasaty jáne onyń búgingi jemisteriniń biri – Qazaqstannyń álemdik qaýymdastyqtyń laıyqty múshesine aınalǵany qaýipti indetpen kúres barysynda da kórinip otyr. Búgingi asa kúrdeli
ahýal búkil álemge, bizdiń halyqtyń basyna da túsken úlken syn. Osyndaı syn saǵatta memleket bolyp, halyq bolyp birligimizdi tanytýymyz kerek.
Elbasy maqalasynda – ult densaýlyǵy men memleket qaýipsizdigi bir-birimen etene, egiz uǵymdar ekeni; memleket bul qıyndyqtan shyǵý úshin qoldan kelgenniń bárin jasaıtyny jáne tıisti sharanyń barlyǵyn atqaratyny aıtylǵan. «Birde-bir adam, elimizdiń eshbir azamaty qamqorlyqsyz qalmaıdy» dedi Elbasy. Bul – asa izgi sóz. Indetpen kúresýge memleketimizdiń qaýqar-qýaty jetkilikti, qarjylyq jaǵdaıy, tıisti qory bar, ekonomıkamyzdyń ornyqty ekeni aıtyldy. Al osyndaı syn saǵatta úlken rýhanı kúsh – halqymyzdyń tózimdiligi, erik-jigeri jáne ózine degen zor senimi.
Elbasynyń aǵa urpaqqa, zııaly qaýymǵa qarata aıtqan sózderi bizge úlken jaýapkershilik júkteıdi. Bizge birlik kerek, «tórteý túgel bolsa tóbedegi keledi» deıdi halqymyz. Bul kúnder – árbir azamattyń jeke jaýapkershiligin talap etetin kúnder. «Jaqsy sóz – jarym yrys» deıdi halqymyz. Sondyqtan da alypqashpa sózderden, jaman nıetti aqparattardan alys bolaıyq. Qaýipti dertpen kúrestiń aldyńǵy shebinde júrgen dárigerler, el qorǵaýshylar, ózge de tıisti jumystaryn atqaryp júrgen azamattarǵa kúsh-qajyr, tózim tileıik. Memleketimizdiń osy syn sátte júrgizip otyrǵan saıasatyn ortalyqtarda, jer-jerde júzege asyryp otyrǵan basshy azamattarǵa úlken biliktilik, anttaryna adaldyq tileıik. «Birlese bilgen el bárin jeńedi» deıdi Elbasy. Bul ataly sózge men de qosylamyn. Osyndaı syn saǵatta bárimiz birge, sabyrly jáne asa jaýapkershilikte bolaıyq.
Sábıt ORAZBAEV,
Qazaqstannyń halyq ártisi, Memlekettik syılyqtyń laýreaty
