Qazaqstanda engizilgen tótenshe jaǵdaı men oqýshylardyń qashyqtan oqytý túrine aýysýyna baılanysty Bilim jáne ǵylym mınıstrligi
9 (10) synyp oqýshylary úshin qorytyndy attestattaý emtıhandaryn, al 11 (12) synyp oqýshylary úshin memlekettik qorytyndy attestattaý emtıhandaryn ótkizbeý týraly sheshim qabyldady.
«Biz saraptaı kele osyndaı sheshim qabyldadyq. Tıisti ózgertýler Mınıstrliktiń buıryqtaryna engizildi. Jekelegen emtıhandar ótkizilmeıtin bolady. Bul oqý jetistikterin qorytyndy baǵalaýdyń barynsha ádildigin qamtamasyz etedi», dep habarlady Mınıstrliktiń baspasóz qyzmeti.
Esterińizge sala ketsek, negizi 9 (10) synyp túlekteriniń qorytyndy attestattaýy:
1) ana tili boıynsha jazbasha emtıhan (oqytý tili boıynsha) – esse túrindegi jazbasha jumys, gýmanıtarlyq sıkl pánderin tereńdetip oqytatyn mektep oqýshylary úshin maqala/áńgime/esse túrindegi jazbasha jumys;
2) matematıkadan (algebradan) jazbasha emtıhan;
3) oqytý orys/ózbek/uıǵyr/tájik tilinde júrgiziletin synyptarda qazaq tili men ádebıetinen jazbasha emtıhan jáne oqytý qazaq tilinde júrgiziletin synyptarda orys tili men ádebıeti páninen jazbasha emtıhan;
4) tańdaý páni boıynsha (fızıka, hımııa, bıologııa, geografııa, geometrııa, Qazaqstan tarıhy, dúnıejúzi tarıhy, ádebıet (oqytý tili boıynsha), shet tili (aǵylshyn/fransýz/nemis), ınformatıkadan jazbasha emtıhan retinde ótkiziletin.
11 (12) synyp oqýshylary úshin qorytyndy attestattaý:
1) ana tili men ádebıeti boıynsha jazbasha emtıhan (oqytý tili boıynsha) esse túrinde;
2) orys/ózbek/uıǵyr/tájik tilinde oqytatyn mektepterde qazaq tili boıynsha testileý jáne qazaq tilinde oqytatyn mektepterde orys tili boıynsha testileý;
3) algebra jáne taldaý negizderi boıynsha jazbasha emtıhan;
4) Qazaqstan tarıhy boıynsha aýyzsha;
5) tańdaý páni boıynsha testileý (fızıka, hımııa, bıologııa, geografııa, geometrııa, dúnıejúzi tarıhy, ádebıet (oqytý tili boıynsha), shet tili (aǵylshyn/ fransýz/ nemis), ınformatıkadan testileý túrinde josparlanatyn.
Aıta keterligi, qazirgi ýaqytta Ulttyq biryńǵaı testileýdi ótkizý merzimi ózgerissiz qalyp otyr. Túlekter Ulttyq testileý ortalyǵynyń saıtynda ornalastyrylǵan synama testterin tegin paıdalana alady. Ár pán boıynsha testileýdiń 70 biregeı nusqasy usynylyp otyr.
Esterińizge sala keteıik, 2017 jyldan beri UBT nátıjeleri JOO túsýge jáne bilim granttaryn ıelenýge, al qorytyndy attestattaý emtıhandarynyń nátıjesi attestat alý úshin qajet.
