Qazir Whatsapp, ZOOM jáne t.b. baǵdarlamalar arqyly 1326 tyńdaýshyǵa qazaq tilinen onlaın oqytý kýrsy júrgizilýde. Sonymen qatar, 110 memlekettik qyzmetkerlerge de aǵylshyn tilinen onlaın kýrstary ótip jatyr.
Qalamyzdyń eresek turǵyndaryna tájirıbeli ádistemeleri qalyptasqan bilikti oqytýshylar sabaq beredi.
«Onlaın oqytý kezinde til úırenýshi ózine qolaıly ýaqytta, ózine yńǵaıly orynda, ıaǵnı, jumys kabınetinen, úıden, sabaqtan da qol úzbeı, tıimdi qarqynda til úırene alady. Topta oqý men sabaq kestesi ózine tıimsiz dep sanaıtyn eresekter úshin onlaın oqytýdyń paıdasy orasan zor. Onlaın oqý úshin til úırenýshilerden ınternetke qosylǵan derbes kompıýter, tegin júkteletin skaıp baǵdarlamasy jáne eń bastysy, «qazaq tilin úırenemin» degen nıeti, maqsaty bolýy qajet. Tyńdaýshylarymyzdyń qalaýy boıynsha WhatsApp, Zoom, Telegramm júıesindegi baǵdarlamalardy ınternet jelisinde qoldanyp, chat tobyn quryp, sabaq júıeli túrde ótkiziledi.
Oqytý úderisinde til úırenýshilerdiń deńgeıleri ártúrli bolýyna baılanysty, til úırenýshilerdiń talabyna, suranysyna baǵyttalǵan ádis-tásilder qoldanylady.
Onlaın sabaqtar barysynda til úıretýshi men úırenýshi arasyndaǵy qarym-qatynas úzilmeıdi. Kerisinshe, tyńdaýshy óz boıyna tereń jaýapkershilikti alyp, tapsyrmalardy tyńǵylyqty oryndaýǵa tyrysady. Onlaın sabaqtyń qıynshylyǵy WhatsApp, Zoom arqyly konferensııa sabaqtar júrgizgende ınternet jelisiniń durys ustamaýy, tyńdaýshylardyń qaıta-qaıta jeliden úzilip ketýi kedergi keltiredi. Degenmen soǵan qaramastan, sabaq berýde zamanaýı tehnologııalar múmkindiginiń arqasynda til úıretý daǵdylarynyń barlyǵy qamtylýda» – deıdi qazaq tiliniń oqytýshylary.
Til úırenýge degen yntalary arqasynda elordanyń № 8,10 emhana qyzmetkerleri de jumystan bos ýaqyt kezinde onlaın oqý kýrsyna qatysyp jatqandyǵy týraly dárigerlerge qazaq tilin oqytyp júrgen Valentına Ýmarkanova aıtýda.
Halyqqa qyzmet kórsetý ortalyqtarynyń mamandaryna «Qoljetimdi orta qurý» maqsatynda qala ákiminiń jobasy aıasynda uıymdastyrylǵan oqý kýrsyn aǵylshyn tili oqytýshylary Gaýhar Aǵzamova men Jánibek Baıhanov onlaın júıesinde júrgizýde. Tyńdaýshylar aǵylshyn tili oqý kýrsy kezinde shettildi azamattardy «bir terezeden qabyldaý» maqsatynda qajetti aýyz eki dıalogty sózdikter qurastyrýda.
