Álemdik statıstıkaǵa úńilsek, sońǵy kúnderi jahan jurtshylyǵyn úreı qushaǵyna alǵan qaterli pandemııanyń qarqyny sál de bolsa báseńsidi. Jaı kezde oıy birige bermeıtin álem halqynyń qazirgi tilegi bir. Ol – qaýipti indettiń kelmeske ketýi. Qasıetti aı qarsańynda ásirese, musylman qaýymy qıyndyqtyń beti beri qarap, qalypty ómirge qaıta qadam basýdy úmit etip otyr. Muny áleýmettik jelilerdegi «Ramazanǵa deıin aty jaman tumaý toqtasyn» degen sarynda jazylǵan tilekter tizbesi men jarııalanymdardan anyq baıqaýǵa bolady.
Aýyz bekitsem dep nıet qylǵan aǵaıynǵa Qazaqstan musylmandary dinı basqarmasy resmı saıtynyń ishinen qosymshasy iske qosylǵanyn súıinshilep aıta ketken lázim. Atalǵan saıttan Ramazan aıyna qatysty búkil málimetterdi tabýǵa bolady. Azamattar kókeıde júrgen saýaldaryn osy qosymsha arqyly bilikti ımamdarǵa joldaýyna da múmkindik ashylyp otyr.
«Quran aıyn asyǵa kútip júrgen jandar bizge jıi habarlasýda. Kópshiligi sáresi men aýyzashar, orazany buzatyn jáne buzbaıtyn nárseler, basqa da túrli suraqtaryn qoıyp jatady. Maqsatymyz – turǵyndardyń dinı saýatyn ashyp, durys baǵyt-baǵdar berý», deıdi QMDB ókilderi.
Al oqyrmandar tarapynan basqa da qosymsha suraqtar týyndaǵan jaǵdaıda QMDB Ortalyq apparaty janynan ashylǵan Dinı aqparat ortalyǵyna (Sall-center) 33-30-30 nómiri boıynsha habarlasýǵa bolady.
Bıyl qasıetti Ramazan aıy 25 sáýirde bastalady. Al, 20 mamyrdan 21 mamyrǵa qaraǵan túni musylman jamaǵaty Qadir túnin qarsy alsa, Oraza aıt meıramy 24 mamyrda.
