Dál osy kezeńde saıajaıshylar tóńirekterin tazalap, qoqystaryn órtteı bastaıdy, astyq egetin sharýa da byltyrdan qalǵan sabandy kúıdirýge kirisedi. Al sekýndyna 20 metrlik, keıde odan da kóp jyldamdyqpen soǵyp turǵan ókpek jel otty aspanǵa birden laýlatyp, jaqyn mańdaǵy adamdardyń ózderi men múlkine órt qaýipsizdigin týdyrady. Osy kezeńde 55 ret shóp kúıdirýden órt tutanǵan. О́tken demalys kúnderi ǵana 10 ret órt shyqqan. Jeldiń jyldamdyǵy da osy kúnderi qatty artyp, sekýndyna 28 metrge jetken.
N. Atyǵaev órt sóndirýge qaladaǵy barlyq bólimderdiń avtomashınalary qatysqanyn aıtty. «Qazir órt qaýpin boldyrmas úshin biz sharýalar men saıajaıshylardy qoqys jaqpaýǵa, saban kúıdirmeýge shaqyrýdamyz. Biraq halyqtyń kóbi bizdiń eskertýlerimizge qulaq aspaýda. Karantınniń bolǵanyna qaramastan saıajaıshylar qystan qalǵan qoqystaryn jınap, úzilissiz órtteýde. Saban órtteýshilerge qatysty biz 31 mobıldi top jasaqtadyq, qaı jerde órt bolsa, aldymen solar jetedi», dedi polkovnık. Sonymen birge ol órtke ulasqan ot jaǵýshylarǵa keminde 500 AEK kóleminde aıyppul salynatynyn eskertti. О́tken demalys kúnderi ǵana sondaı 10 adamǵa aıyppul salynypty.
Sóziniń sońynda polkovnık N.Atyǵaev «órtke qaýipti kezeń» mamyr aıynyń aıaǵyna deıin sozylatynyn jetkizdi. Sonymen birge ol tasqynnyń barysynan jýrnalısterdi habardar etti. Sergeevka sý qoımasyndaǵy qaýipti kezeńi artta qalypty. Ondaǵy sý deńgeıi 195 sm-ge kóterilgen edi, qazir 165 sm tústi, dedi ol. Mman sý basý qaýpi de qalyptaǵy jaǵdaıda bolatynyn jetkizdi.
Soltústik Qazaqstan oblysy
