Infeksııalyq bólimsheniń medısınalyq qyzmetkerleri jankeshtilikpen áreket etip júr. Sonyń nátıjesinde ólim-jitim joq, jýyrda bir jas áıel emdelip, aýrýhanadan shyqty. Bas dáriger Botagóz Súleımenova: «Áriptesterimiz óz mindetterin adal atqarýda. Dárigerler Ǵalııa Syzdyqova, Aınagúl Qasybaeva, Áýbákir Omarálıev, medbıkeler Shtol, Shırochenko, Poberejnık, Sergeeva, bári de óz isterine berilgen, adal qyzmet etip júrgen jandar. Al bólimsheniń sanıtar-tazalyqshylary Aıtmaǵambetova, Qadyrova, Rojkova, Bajenova, Lýsenkolar da tek joǵary baǵaǵa laıyqty», dedi.
Qazir bólimshede 24 naýqas bar. Derttiń beti qatty bolsa, dereý ókpeni jasandy jolmen jeldetetin apparatqa jatqyzylady. Al emdeý barysy respýblıkalyq mamandardyń anyqtaǵan ádisterimen júrgizilýde. Qajetti dári-dármekter jetkilikti. Naýqasqa aýrýhanaǵa túskennen 14 táýlikten keıin saraptama jasalady. Eger ınfeksııa joǵy anyqtalsa, dereý ústi-basy tolyqtaı dezınfeksııalanyp, úıine arnaýly kólikpen jetkiziledi. Al dárigerler, medbıkeler jáne tazalyqshylar úılerine jiberilmeıdi. Bir kúndik aýysymyn atqarǵan soń olardyń ústi-basy tegis dezınfeksııalanyp, arnaýly kólikpen, eshqaıda shyǵarmaı «Altyn orda» qonaqúıindegi jeke nómirlerge jetkiziledi. Kelesi aýysym bastalǵansha olar qonaqúıde bolady. Úı-ishi, bala-shaǵasymen tek telefon arqyly sóılese alady. Botagóz Súleımenovanyń aıtýyna qaraǵanda, mundaǵy jaǵdaı óte jaqsy kórinedi. Sonymen birge ol dárigerlerdi qoldap, bir rettik kostıýmder ápergen Alla Pısarenko basqaratyn «Isker áıelder qaýymdastyǵy» qoǵamdyq uıymy men dámdi taǵamdar jetkizip otyrǵan Saıran Hamzın basqaratyn «Restoratorlar qaýymdastyǵy» qoǵamdyq uıymyna da alǵys aıtty.
Qazir ınfeksııalyq bólimsheniń medısınalyq qyzmetkerleri naýryz aıynyń qosymsha aqysyn da tolyq aldy. Bul da aq jeleńdi jandardyń eńbegin yntalandyra túsýge zor yqpal etip otyr.
PETROPAVL
