Osydan 16 jyl burynǵy Olımpıada quddy alyptar aıqasy ispetti. Reseılik kommentator qazaq boksshysynan góri qarsylasyna bura tartatyn tárizdi. Onyń da ózindik syry bar, jartylaı fınalda bizdiń boksshy reseılik bylǵary qolǵap sheberiniń ataq-dańqynan qaımyqpaı, sheberligin tanytty. Alashtyń óreni Oleg Saıtovty Olımpıadanyń úsh dúrkin chempıony bolý múmkindiginen aıyrdy...
Afınaǵa beımálim boksshy sanatynda attanǵan oǵylannyń jeli ońynan turdy. Baqtııar kýbalyq Lorenso Aragonǵa aqtyq kezdesýde bas kótertpedi. Stıvensonnyń izbasary qansha jerden ekilenip alǵa umtylǵanymen, qarsylasynyń qaýqarly soqqysyna qarsy qaırat ete almady. Artaevtyń asyǵy alshysynan tústi. Altyn medal Qazaqstan qorjynynda! Oǵan qosa Olımpıadanyń eń úzdik boksshysyna beriletin Vel Barker kýbogyn ıelengeni taǵy bar! Bul – 2004 jyly ejelgi Ellada elinde ótken Olımpııa oıyndary edi....
2008 jyl. Beıjiń Olımpıadasy. Fınaldyq jekpe-jek. Rıngtiń qarsy buryshynda Kýbanyń úkilegen úmiti. Bizdiń jigit serııaly soqqylar jasaıdy. Kýbalyq Karlos Banteýr soqqysy aýa qarmap jatyr, qarsylasy oń jaǵyna bir, sol jaǵyna bir jalt-jult etip shyǵa keledi.
Tórt raýnd boıy Karlos ábden dińkeledi. Jyldar boıyna shegine jetken tózim tıegi aǵytylyp, búgin kýbalyq boksshyǵa soqqy bolyp jaýyp jatqandaı. Qazaq boksshysy soqqyny ústi-ústine tópeleı túsedi. Esep 18:9 Baqyttyń benefısi edi bul. Beıjińde Sársekbaev teńdessiz boksshy ekenin dáleldep, qazaq ánurany kókte qalyqtady!
Qansha myqty bolsań da, jarys ótip jatqan eldiń órenimen saıysqa túskende «Qalaı bolar eken?» degen kúmán-kúdiktiń boıyńdy bıleıtini bar. 2012 jyly Londonda da dál sondaı kúıde boldyq. Aqtyq synda bizdiń boksshynyń shóbi Freddı Evansqa túsýin nege joryrymyzdy bilmedik. «Táýekel! Alyp shyǵady!».
«Freddı» degen daýys zalda jańǵyryp turdy. Qarsylastyń mysyn basatyndaı qalyń jurt. Biraq Serik Sápıev ózine nyq senimdi. Oń qolymen qarsylasyn túrtkileıdi de, sol qolymen soqqy jasaıdy. Aıaǵymen erkin qımyldap, rıngtiń ortasyn oıqastap júr.
Bastan-aıaq basty rólde oınaǵan bizdiń oǵylan Evansqa esh múmkindik bergen joq. Shabýyldy saıystyń sońyna deıin áste báseńdetpedi. Aǵylshyn boksshysy qorǵanýmen álek. Jeńisti julyp alý degen osy bolar. Naǵyz jeńimpaz. Tumandy Albıon altyn tuǵyrǵa kóterilgen Serik syndy Alashtyń aıbyndy ulyna qol soqty. Osymen ekinshi márte Alash balasy Vel Barker kýbogyn ıelendi!
«Bizdiń Álimhanmen sóz talastyratyn orystan da ul týypty-aý» demekshi, sońǵy kezderi ózbek boksshylary da Olımpıadanyń aqtyq synynda óner kórsetip júr. Ásirese 2016 jyly Rıoda ózbek boksshylarynyń mereıi ústem boldy. Biraq bizdiń salmaqta emes!..
Danııar jyldamdyǵynyń arqasynda jeńiske jetti. Shahram Gııasov yshqyna umtylǵanymen, soqqysyn daryta almaı júr. Kerisinshe bizdiń boksshy qarsylasyna dál soqqymen jaýap beredi. Birese oń jaǵynan, birese sol jaǵynan sytylyp shyǵa keledi. Bir qaraǵanda Gııasov jıi shabýyldaǵandaı bolǵanymen, dóp tıgen soqqysy sırek. Danııardyń shapshańdyǵynan Shahramnyń silikpesin shyǵyp, ashý-yzaǵa boı aldyrdy. Sóıtip jeńiliske ushyrady. Jeńis Eleýsinovtiń enshisinde!
Tórt Olımpıada, tórt altyn! Álemde «qazaqtyń salmaǵy» atalyp ketken 69 kıloda jeńimpazdar dástúri Tokıoda – besinshi Olımpıadada jalǵasyn taba ma? Árıne Abylaıhan Júsipov lısenzııany jeńip aldy. Jaýapkershilikti arqalaı ala ma? Qazir kásibı rıngte atoı salyp júrgen Sadrıddın Ahmedovti qurama bapkerleri áýesqoı bokspen erte qoshtastyrǵan joq pa? Aslanbek Shymbergenovtiń de shamyrqanyp turǵan shaǵy emes pe? Tańdaý kimge túsedi? Bapkerler bura tartyp, «qazaq salmaǵynyń» kıesine ushyrap júrmese eken...
