Biz tildesken balalardyń derligi jeke noýtbýk, ınternet tartylǵan telefony bola tura tek telearnadaǵy sabaqtardy qarap, WhatsArr áleýmettik jelisi arqyly úı tapsyrmasyn joldaýmen jańa formattyń aıasyn taryltyp júr. Shyn máninde qazir eshqandaı megabaıt almaı-aq óz ónimin, kontentin tegin usynyp otyrǵan bilim berý platformalary barshylyq. Mine, osy saıttarmen tolyǵyraq tanystyrmaqpyz.
Qazir muǵalimder arasynda keń qoldanysqa ıe bolyp otyrǵan bilim berý platformasynyń biri – Daryn.online. Platformanyń negizin qalaýshy Aıbek Qýatbaıdyń málimdeýinshe, 2 mln 219 myń oqýshy jáne 138 myń 922 muǵalim tirkelgen. Munda qazirdiń ózinde 1-11 synyptarǵa arnalǵan 1416 vıdeo sabaq bar. UBT tapsyrýǵa da bolady. Bastysy tirkelip alasyz, ári qaraı oqýshynyń jeke kabıneti bolady. Aıtpaqshy, bul platformanyń mobıldi qosymshasy da bar. Ony búginde 1 mln 100 myń adam kóshirip alypty. Platforma muǵalimder úshin de óte yńǵaıly, olar member.daryn.online jańa júıesi arqyly oqýshylardyń operasııalaryn (vıdeo qaraǵanyn, test tapsyrǵanyn, tapsyrma oryndaǵynan) qadaǵalaı alady.
Ekinshi usynylatyn bilim berý platformasy – Bilimland. Bul júıe mektepter qashyqtan oqytýǵa kóshken alǵashqy 5 kúnde 15 mln 100 myń qaralym jınady. Bilimland bilim berý platformasynyń mańyzy sol – telearnalardaǵy sabaqtardy osy saıttan qaıta kórýge múmkindik beredi. Iá, «qaıtalaý – bilim anasy» desek, onyń ústine keıbir tustaryn túsinbeı qalǵan oqýshylar úshin beınesaqty qaıtalap kórý jańa taqyrypty jaqsylap ıgerýge kómektesetini sózsiz. Oqýshyǵa yńǵaılysy – jańa sabaqty beıne arqyly muǵalim túsindiredi, sonan soń jattyǵýlar jasalady. Jańa taqyrypty mysal-jattyǵaýlarmen túsingennen keıin úı tapsyrmasy beriledi. Muǵalim de úsh deńgeıli tapsyrmalardy oryndaǵan oqýshysymen forýmdar arqyly túsinbegen tustaryn talqylaı alady.
Kundelik.kz júıesimen tanyspaǵan muǵalimder men oqýshylar neken-saıaq bolar. Bul sózimizge Bilim jáne ǵylym mınıstri Ashat Aımaǵambetovtyń: «Bir ǵana Kundelik.kz júıesinde 32 mln ret seksııa bolypty, ıaǵnı osynsha ret saıtqa kirý áreketi tirkeldi. Bul – rekord. Biz Egov portalyndaǵy 15 mln sessııany kóp degenbiz. Sonymen salystyrǵanda bilim berý salasynyń bir ǵana júıesindegi sessııa eki ese kóp kórsetkish kórsetip otyr», degeninen anyq baıqaýǵa bolady. Dese de ony tótenshe jaǵdaı kezinde qoldanýdy tegin etkeninen kóbi habardar ekenine kúmánimiz bar. Oqýshynyń eń qajetti quraly – kúndelik qoı, bul sonyń elektrondy nusqasy. Al muǵalimderge qajetti kezi kóp, máselen, 1-10 synyptarǵa arnalǵan 2019-2020 oqý jylynyń BJB jáne TJB jóninde eskertpelerimen tanysýǵa bolady.
Bilimal.kz – balańyzdyń bilimi men áleýetin zamanaýı basqarý júıesi. Bul joba ata-analarǵa balalarynyń bilim alýyn baqylaýǵa kómektesý úshin qurylǵan. Saıttaǵy Demo-kúndelikke kirip, tirkelý arqyly ata-ana balasynyń sabaq kestesin, kúndeliktegi baǵalaryn, toqsandyq jáne jyldyq qorytyndy baǵalary kórsetilgen tabelin, synyp saǵattaryn, muǵalimder tizimin, toqsandyq oqý josparyn, pánder boıynsha úlgerim grafıgin kóre alady. Bul úshin álbette mektep osy bilim berý patformasymen jumys isteıtin bolýy kerek.
Mektep Smart Nation – jalpy orta bilim berý salasynda memlekettik qyzmetterdi alýǵa arnalǵan biryńǵaı portal, orta bilim berý uıymdarynyń jalpyǵa qol jetimdi tizimi kórsetilgen mektepti basqarý júıesi. Munda balany mektepke tirkeýge, mektep aýystyrýǵa mamandandyrylǵan mektepterge ornalastyrý jáne synyptan synypqa aýystyrý ótinishin berýge, lagerge joldama alýǵa, qajetti aımaqtan bilim berý uıymyn tańdaýǵa múmkindik bar.
Testcenter.kz – Ulttyq testileý ortalyǵynyń saıty. Bul ortalyq saıty arqyly elimizdegi barlyq bıylǵy mektepti támamdaıtyn oqýshylarǵa tótenshe jaǵdaıǵa baılanysty tegin UBT synyq emtıhandaryn tapsyrýǵa jáne daıyndalýǵa jaǵadaı jasap otyr. Bul týraly ortalyqtyń dırektory Dıdar Smaǵulovtyń: «117 myń túlekke arnalǵan jaǵymdy jańalyǵymyz bar. Saıtymyzda Ulttyq biryńǵaı testileýdiń onlaın baıqaý synaqtaryn tegin ettik. Buǵan qosa, testter bazasyn maksımaldy túrde jańartyp, ár pánnen 70 biregeı nusqa engizdik», dep súıinshilegeni esimizde.
