Sondaı-aq Túrkistan qalasynda sıtýasııalyq ortalyq ashylyp, turǵyndardyń erkin júrip-turýyna shekteýler qoıyldy. Bul týraly jedel shtab jıyny kezinde qala ákimi Rashıd Aıýpov málimdedi. «Bul qala karantınge jabylady degen sóz emes. Shekteýler ǵana. Dúısenbi sıtýasııalyq ortalyq jumysyn bastap, oǵan polısııa, tótenshe jaǵdaı, taýarlar men kórsetiletin qyzmetterdiń sapasy men qaýipsizdigin baqylaý, dárigerler jáne ákimdiktiń ár sala mamandary tartylady. Beınekamera ornatylyp, dıspetcherlik baılanys nómir qarastyrylady», dedi Rashıd Abatuly. Qala ákiminiń tapsyrmasyna sáıkes, endigi jerde qoǵamdyq kóliktiń qozǵalysyna da shekteý qoıylady. Turǵyndarǵa «Altyn bulaq» kóterme saýda bazarynan dúkenderge jóneltilgen azyq-túlik jetkiziledi. Odan bólek, tapsyrys arqyly qyzmet kórsetýge 22 kólik daıyn. Aldymen, kúrish, makaron, kartop, sábiz, oramjapyraq, pııaz, tuz, kúnbaǵys maıyna tapsyrys qabyldansa, suranys boıynsha tizim ulǵaıatyn bolady. Jetkizý qyzmetine dárihana, dámhanalar men meıramhanalar da qosylady.
Qala ákimdiginiń 6 mobıldi toby men polısııa qyzmetkerleri jurtshylyqty qajetsiz syrtqa shyqpaý boıynsha túsindirýdi bastap ketti. Sondaı-aq, blok beketterdegi baqylaý jumysy qatań qadaǵalaýǵa alynǵan.
Túrkistan oblysy
