–Oblystyq bas memlekettik sanıtarlyq dárigerdiń qaýlysymen Atyraý qalasynda karantınniń mezgili 1 mamyrǵa deıin uzartylyp, jeke avtokólikpen júrýge tyıym salyndy. Qazir qala aýmaǵynda polısııanyń jeke quramy jumys istep jatyr. Atyraý oblysy polısııa departamentiniń jergilikti polısııa qyzmeti basqarmasynyń basshysy Álibek Qaıyrovtyń aıtýynsha, ruqsatsyz júretin kóliktirdiń sany azaıǵan. Keshe 12 quqyqbuzýshylyq tirkelgen. Al, búgin kúsheıtilgen shekteýlerdi buzǵandarǵa 10 ákimshilik hattama toltyrylǵan. Qazir tek arnaıy ruqsat berilgen kólikter ǵana júrip jatyr, -dep habarlady oblys ákiminiń baspasóz qyzmeti.
Atyraý qalasynyń ákimi Qaırat Orazbaevtyń aıtýynsha, qarttar men múgedekterge, jalǵyzbasty azamattarǵa tamaq, dári-dármek jetkizip berý men qosymsha qyzmet kórsetilýde. Qalada karantın bastalǵannan beri demeýshilermen birlesip, «BizBirgemiz» aksııasy aıasynda 179 jalǵyzbasty zeınetker men múgedekke ystyq tamaq jetkizilgen. Sondaı-aq, I-II-shi toptaǵy múgedektigi bar balalar, jetim balalar, jalǵyz turatyn zeınetkerler men 109 senim telefonyna habarlasqan azamattar azyq-túlikpen, gıgıenalyq ónimdermen qamtamasyz etilgen.
–Oblys turǵyndarynyń jartysynan astamy Atyraý qalasynda turady. Koronavırýs ınfeksııasyn juqtyrǵandardyń basym bóligi osynda tirkeldi. Sondyqtan, qalada karantın talaby qatań saqtalýy kerek. Karantın merzimin uzartý biz úshin de ońaı bolmady. Eń basty maqsatymyz – adamdardyń densaýlyǵy men qaýipsizdigin saqtaý. Biz osyny eskerip, osyndaı sheshim qabyldadyq. Bizge tártip pen tózim kerek. Sonda ǵana qaýipti ınfeksııany der kezinde aýyzdyqtaımyz, -dedi Atyraý oblysynyń ákimi Mahambet Dosmuhambetov.
Jumasat ǴAZIZ
