Kópshiliktiń yqylasyna bólengen aıtýly jobany kezekte ret Jambyl atyndaǵy memlekettik fılarmonııanyń solısi, dástúrli ánshi, halyqaralyq baıqaýlardyń laýreaty Maqpal Qazybekqyzy jalǵamaq. Kóńil quryshyn qandyratyn maqpal daýystyń ıesi 22 sáýir kúni saǵat 20.00-de óner ordasynyń resmı paraqshalarynan tikeleı jelige shyǵyp, óner súıer qaýymmen dıdarlasatyn bolady.
Onlaın konsertte Súıinbaı Aronulynan «Jaqsy men jamannyń aıyrmasy», «Aqyn boldym jıyrmamda», «Biz Sonarshy», Jambyl jaýharlarynan «Sarybaıǵa», «Jıyrma bes» sekildi týyndylar oryndalady. Sondaı-aq Kenenniń «Oıjaılaýy», Manarbek Erjanovtyń «Saıra bulbuly», Halyq áni «Bulbul qusym», Isa Baızaqovtyń «Jeldirmesi», «Ábdiǵalıdiń termesi» sekildi tanymal týyndylardy jandy daýysta tyńdaýdyń taptyrmas múmkindigi týyp otyr.
Dala jaýharlarynyń qaınarynan qanyp iship, dástúrli ónerimizdi dáriptep júrgen ánshi óz oıymen bólisti.
–Jetisý óńirindegi jyrshylyq dástúrdi tilge tıek etken kezimizde sóz zergeri Súıinbaı Aronulynan aınalyp óte almasymyz anyq. Esimi Túbek, Qaban jyraýlarmen qatar atalyp, dáripteletin Súıinbaı aqyn zamanynda el men eldi, er men erdi biriktirip, bitistirýde eleýli eńbek etken sózi ótkir, oıy ushqyr aqyn bolǵan. Shyǵystyń qundy qazynasy «Myń bir tún», «Shahnama» sııaqty ańyz-ertegilerdi ózinshe jyrlap, tyńdaýshysyn tánti etken erekshe tulǵa. Sol sekildi Jetisý mektebin sóz etkendi jyr alyby Jambyldy da atamaı kete almaımyz. Keń dalany ásem ánimen terbetken Kenen shyǵarmalary da urpaq úshin máńgi mura. Konsertte budan basqa da eń tańdaýly týyndylardy kórermenge tartý etpekpin, – deıdi dástúrli ánshi Maqpal Qazybekqyzy.
