Biraq belbeýdi bosatyp, arqany keńge salýǵa bolmaıtynyn jergilikti bılik te, dárigerler de aýyzdarynan tastamaı aıtýda. Endi she, jan-jaǵymyzda indet antalap tursa, odan qutyldyq dep aıta alamyz ba? Biraq ózin ǵana oılaıtyn kóptegen adamdar ózi men jaqyndaryna jetpegenine máz bolyp, indettiń aýyly alystady dep oılap, aýyzdaryna kelgen sandyraqtaryn soǵýda. Sonyń ishinde karantınniń ózgertilmegeni bılikke tıimdi dep soǵatyndar da shyǵypty. Nege ekenin aıta almasa da áıteýir aýyzdaǵysyn sandyraqtaıdy. Kerisinshe, karantın aldymen bılikke, memleketke tıimsiz ekendigine, ekonomıkaǵa ájeptáýir soqqy keltiretinine ondaılar oı júgirtpeıdi.
Qaladaǵy habary mol adamdardyń arasynan da osyndaılar shyǵyp jatqanda aýyl turǵyndary arasynan qaýipti sezinbeıtinder kóp. Mysaly, Shal aqyn aýdanynyń ortalyǵyndaǵy indet juqtyrǵan degen kúdigi bar adam aýrýhanaǵa jatqyzylǵan eken, 1962 jyly týǵan sol jigit aýrýhanadan qashyp shyǵyp, ekinshi kúni zorǵa ustalǵan. Eger boıynda indet bar bolsa, onyń qanshama adamǵa juqtyrǵany belgisiz.
Úı jaıyndaǵy karantındi ustaýǵa mindettelgen taǵy bir osy aýdannyń turǵyny blok-beketti aınalyp ótip, aýdan ortalyǵyna kirmek bolǵan. Polısııa osyndaılarmen kúreste belsendilik kórsetýde, biraq sanasyna bermegenderdi ustaý da qıyn. «Karantın talaptaryn saqtaýǵa mindetti adamdardyń buzýshylyq jasaýyna jol bermeýge tyrysýdamyz. Ol úshin polısııa qyzmetkerleriniń qyraǵylyǵyn arttyryp jatyrmyz», - deıdi aýdandyq polısııa bólimi bastyǵynyń birinshi orynbasary polısııa maıory Beıbit Shánıev. Bárinen buryn adamdardyń ózi indettiń qaýiptiligin túsingeni durys, árıne.
Soltústik Qazaqstan oblysy
