Qoǵamda, sondaı-aq memlekettik basqarý júıesinde jańa ózgertýler júrgizýge baǵyttalǵan ári ekonomıkanyń sapaly qurylymyn qalyptastyrýǵa múmkindik beretin «Bes ınstıtýsıonaldyq reformany iske asyrý jónindegi 100 naqty qadam» Ult jospary Qazaqstanda kásipkerlikti damytýdyń kezekti dáýiri. Osynyń nátıjesinde, qazaqstandyq bıznes qoǵamdyq qurylymdy alǵa jyljytýshy qýat kúshine ıe bolyp keledi. Búgingi tájirıbe halyqtyń áleýmettik jaǵdaıy jaqsarsa, bıznestiń bolashaǵy da kórkeıetinin dáleldep otyr. Bul qozǵalystyń astarynda áleýmettik jaýapkershilik paıymy jatqany da anyq. Bul túsinik aqmolalyq bıznes ókilderin halyqqa jaqyndata túskeni ǵanıbet. Osyndaı ıgi isterdi Esil aýdanynan da kóptep kórýge bolady.
Atalǵan baǵyttyń basty tiregi – bıznestiń áleýmettik jaýapkershiligi negizindegi memorandýmdardy qabyldaý. Byltyr aýdanda 96 mıllıon teńgeden astam qarjyny qamtıtyn 67 kelisim jasalǵan. Sóıtip, qol qoıylǵan mindetteme tolyq kóleminde oryndaldy. Osy rette, «Zarechnyı» jaýapkershiligi shekteýli seriktestigi 66 mıllıon teńgeniń, «Kompanııa Orıon Plıýs» JShS 13 mıllıon, «Agrofırma Qarakól» JShS 4 mıllıon teńgeden astam qarjy bólgenin atap kórsetkimiz keledi. Buǵan qosa, «Novo-Prırechnoe» JShS, «Qymbat» sharýa qojalyǵy jáne «Agro-Oldıvı» JShS kóp balaly otbasylardyń turǵyn úılerin jóndeýge qomaqty qarjy aýdardy. Jalpy, memorandým jobalary negizinen mektepterdi ystyq tamaqpen qamtamasyz etý, eldi mekenderdi abattandyrý men sanıtarlyq tazalyǵyn saqtaý, merekelik jáne mádenı-kópshilik sharalaryn uıymdastyrý, sý jáne jylý júıelerin, joldardy jóndeý, áleýmettik turǵyda az qamtylǵan turǵyndarǵa qaıyrymdylyq kómek kórsetý sharalaryna baǵyttalǵan.
Sondaı-aq atqarýshy organdar, jumys berýshiler jáne kásipodaq uıymdary arasynda, búgingi ýaqyt talabyndaǵy ózekti máseleler boıynsha, ózara yntymaqtastyq kelisimsharttary buljytpaı oryndalýda. Máselen, jergilikti óndiristik júıeni turaqtandyrý, azamattardyń eńbek qatynastary quqyqtary men jumyspen qamtylýyn qamtamasyz etetin memorandýmǵa 3178 adamdy qamtıtyn 135 eńbek ujymy qol qoıyp otyr.
Taǵy bir mańyzdy qadam retinde, «Zarechnyı» JShS ekonomıkanyń dástúrli salalarynda jańa tehnologııalardyń engizilýine oraı, adamdardyń jumystan bosap qalýyn boldyrmaý maqsatynda, 2018-2025 jyldarǵa arnalǵan jol kartasyn qabyldaǵanyn aıtýymyz kerek. Jaýapkershiligi shekteýli seriktestik bul úshin iri qara mal sanyn arttyrý, basqa da túlik sanyn kóbeıtý, ozyq tehnologııaǵa negizdelgen astyq pen jarma óńdeýdi molaıtý isin jalǵastyrýda. О́ndiristi qýattandyrýǵa baǵyttalǵan mundaı sharalar jumyssyzdyq máselesin tejeıtini anyq.
Aqmola oblysy,
Esil aýdany
