Abyroı bolǵanda oqys oqıǵadan zardap shekkender joq. 7200 tekshe metr topyraq pen taý jynysy ózen arnasyn bógemeı, Kishi Almaty arnasyna túsken.
«Kóshkin 14-15 sáýir kúnderi tolassyz jaýǵan jańbyrdyń saldarynan boldy. «Qazselqorǵaý» RMQK málimetinshe, kóshkin qaýpi áli de saqtalady. Keshen aýmaǵynda ornalasqan sport zal, basseın jáne ǵımarattar qıraýy múmkin», - dep málimdedi TJD baspasóz qyzmeti.
Mamandar qaıta kóshkin bolýy yqtımal degen ýchaskelerdi anyqtap, atalǵan aýmaqtyń aınalasy jolaq lentamen qorshalǵanyn aıtty. Sondaı-aq mekeme ıesine qaýipti aımaqqa adamdardy jibermeýge jáne ǵımarattarǵa kirýge shekteý qoıý týraly eskertý jasalǵan.
– Jalpy Almaty aýmaǵynda 41 qaýipti núkte bar. Byltyrǵy jyly qaladaǵy qaýipti aýdandardy qujattandyrý úshin bıýdjetten 35 mıllıon teńge bólingen. Qazir sol jumystar júrgizilýde. Bıylǵy naýryz aıynan bastap Medeý jáne Bostandyq aýdandarynda jalpy kólemi 7 220 tekshe metr 4 kóshkin tirkeldi. Olar: «Iýbıleınyı» shaǵyn aýdanyndaǵy Sulýsaı tas jolynda (kólemi 15 tekshe metr); Kýrortnaıa kóshesi, 75 (kólemi 3 tekshe metr); Bostandyq aýdanyndaǵy M. Jumabaev kóshesi 21-úı (kólemi 2 tekshe metr); «Taý-kúni» oqý-saýyqtyrý kesheniniń aýmaǵynda (kólemi 7 200 tekshe metr), – deıdi jaýapty mamandar.
