Azamattyq jáne qyzmettik ot qarýdyń aınalymyn baqylaý jónindegi bólinisteriniń ınspektorlary jergilikti polısııa qyzmetimen birlese otyryp, quqyq buzýshylyq pen qylmystardy eskertý maqsatynda turaqty túrde tekseris júrgizedi. Osyndaı jumystardyń nátıjesinde jyl basynan beri oblysta Ákimshilik quqyq buzýshylyq kodeksiniń «Jeke jáne zańdy tulǵalardyń qarýdy zańsyz ıelenip alýy, berýi, ótkizýi, saqtaýy, alyp júrýi, tasymaldaýy» boıynsha 15 buzýshylyq faktisi anyqtalyp, myltyqtary alyndy.
Máselen, jedel-profılaktıkalyq is-shara barysynda Maǵjan Jumabaev aýdany polısııa bóliminiń qyzmetkerleri Medvejka aýylynyń 29 jasar turǵyny atys qarýyn eshqaıda tirkemegendigimen qoımaı, úıiniń kireberisinde saqtaıtyndyǵy anyqtaldy. Sóıtip, odan tegis uńǵyly 16 kalıbrli «IJ-K» myltyǵy tárkilendi. Qarýdyń qaıdan alynǵany týraly suraqqa ol myltyqty shamamen 10 jyl buryn úıdi satyp alǵan kezde taýyp aldym degen jaýap aıtqan. Myltyqty zańsyz saqtaǵany úshin oǵan qosymsha 20 aılyq eseptik kórsetkish kóleminde aıyppul salý kózdelgen.
«Tirkelmegen atys qarýyn, oq-dáriler men jarylys zattaryn óz erkimen tapsyrǵan azamattar qylmystyq jáne ákimshilik jaýapkershilikten bosatylady. Qarýdy tirkeý, qaıta tirkeý tártipterine qatysty suraqtarmen soltústikqazaqstandyqtar Ákimshilik polısııa basqarmasyna habarlasa alady», - dedi osy basqarmanyń aǵa ınspektory, polısııa maıory Qurman Mýsın.
Soltústik Qazaqstan oblysy
