«Testten ótken adamdardyń barlyǵynda teris nátıje kórsetti. 19 sáýirde jergilikti ýaqytpen saǵat 20.00-de Jylyoı aýdanyndaǵy Teńiz vahtalyq qalashyǵynyń «Bolashaq» kentinde 200 jumysshy jınaldy. Olar «Baılanysta bolǵan tulǵalar» uǵymy týraly habardar bolmaýynan basqa vahtalyq kentterden kóshirilgen jumysshylardy koronavırýs ınfeksııasyn juqtyrǵandar dep eseptep, narazylyq bildirdi.
Qyzmetkerler kompanııa men Jylyoı aýdany ákimdiginiń basshylyǵymen kezdesýde «Birlik» vahtalyq kentindegi koronavırýs dıagnozy rastalǵan jumysshymen baılanysta bolǵan tulǵalardan aýrý anyqtalǵan jaǵdaıda olardy ınfeksııalyq jáne provızorlyq stasıonarlarǵa oqshaýlandyrylatyny týraly kelisimge keldi. Test qorytyndysymen teris nátıje kórsetken tulǵalar 22 sáýirde óndiristik qyzmetke shyǵady» -dep habarlady óńirlik kommýnıkasııalar qyzmeti.
Al, keshe, 20 sáýirde Teńiz vahtalyq qalashyǵynyń «Sana» vahtalyq kentinde turatyn «Konsolıdeıted Konstrakshn Injınırıng & Prokıýrment S.A.L.-ofshor» kompanııasy JShS fılıalynyń 500 qyzmetkeri jumysqa shyqpady. Kompanııa qyzmetkerleri muny «Birlik» vahtalyq kentinde koronavırýs dıagnozymen 1 adam anyqtalýymen, óndiristik qyzmet barysynda aýrýdy juqtyrý qaýpi bar ekeninimen túsindirgen.
Kompanııa basshylyǵy men Jylyoı aýdany ákimdigi tarapynan tıisti túsindirý jumystary júrgizilgen. Nátıjesinde taraptar barlyq jumysshylardy ekspress-testten ótkizýge, eki kúnnen keıin onyń nátıjeleri jarııalanyp, teris qorytyndy shyqqan jaǵdaıda sársenbide, 22 sáýirde jumysshylar keri jumysqa shyǵatyny týraly kelisimge kelgen. Oǵan qosa, kompanııa eki jumys kúniniń jalaqysy saqtalatynyn habarlady.
Al, test qorytyndysy oń nátıje bergen jaǵdaıda aýrýdy juqtyrǵan adamdarǵa stasıonarǵa jatqyzý boıynsha qosymsha sharalar qoldanylatyn bolady. Atyraý oblysy ákiminiń tapsyrmasymen oblys ákiminiń birinshi orynbasary Serik Shapkenovtyń tóraǵalyǵymen arnaıy jumys toby quryldy. Ol Teńiz ken ornyna baryp, qyzmetkerlerdi turǵylyqty jerine deıin jetkizý máselesimen aınalysýda.
Jumasat ǴAZIZ
