Tasymaldaýǵa ruqsat beretin eshqandaı qujaty bolmaǵan. 240 bótelkeniń birde-bireýinde aksızdik marka da bolmaı shyqqan. Sondaı-aq taýardy qaıdan, qandaı jaǵdaıda satyp alǵany jóninde qoıylǵan suraqtarǵa kúdikti jaýap bere almaǵan. Polıseıler osynsha araqtyń shyǵý tegin, sondaı-aq Qazaqstan aýmaǵyna memlekettik sapa baqylaýynan ótpegen spırttik ishimdiktiń qalaı jetkizilgenin anyqtaıtyn bolady.
«Qazir aksızdik markasy joq bolǵandyqtan alkogol ónimderi saraptamaǵa jiberildi. Al ony tasymaldaǵan aýyl turǵynyna qatysty Ákimshilik quqyq buzýshylyq týraly kodekstiń Taýarlarǵa arnalǵan ilespe júkqujattardy usynbaý ne ýaqtyly usynbaý, taýarlarǵa arnalǵan ilespe júkqujatta taýarlar ataýynyń sáıkes kelmeýi, olardyń sanyn (kólemin) anyq kórsetpeý, sol sııaqty taýarlarǵa arnalǵan ilespe júkqujatta munaı ónimderiniń, temeki buıymdarynyń, etıl spırtiniń jáne alkogol óniminiń, bıootynnyń derbes sáıkestendirý nómir-kodyn anyq kórsetpeý boıynsha materıal jınaldy»,- dedi Esil aýdany polısııa bóliminiń bastyǵy polısııa podpolkovnıgi Erlik Eslámbekov.
Buǵan deıin SQO aýmaǵynda osy jyly tárkilengen ashy sýdyń osyndaı iri kólemi tabylǵan joq edi. Osyǵan deıin zańsyz aınalymnan tek 81 lıtr spırttik ishimdik tárkilengen.
Soltústik Qazaqstan oblysy
