Shara el Táýelsizdiginiń 25 jyldyǵyna oraı uıymdastyryldy. Investısııalyq forýmda mamandar pikir jarystyryp, elimizdiń ınvestısııalyq ahýalyn arttyrar jumystar, qolǵa alynǵan jobalar, jetistikter men josparlar jaıyndaǵy aqparattarmen bólisti. Sharany Investısııalar jáne damý mınıstri Jeńis Qasymbek ashyp, sóz sóıledi.
«Qazaqstannyń Investısııalar jáne damý mınıstrligi osy konferensııanyń ótýin memleketimizdiń iskerlik ómirindegi mańyzdy oqıǵa retinde qarastyrady. Bul túrli elderdiń saıası jáne iskerlik sheńberimen dıalog, tikeleı qatynas ornatýdyń tamasha múmkindigi. Biz búgingi kezdesýdi elimizdiń ınvestısııalyq áleýetiniń ilgerileýiniń tıimdi tásili dep bilemiz», dedi J.Qasymbek.
Konferensııada sóz alǵan Eýropa qaıta qurý jáne damý bankiniń Qazaqstandaǵy bólimshesiniń jetekshisi Djanet Hekman aldaǵy jyly Qazaqstannyń ishki jalpy ónimi ósetinin aıtty.
«Eýropa qaıta qurý jáne damý banki Qazaqstanda barlyq salalardy qarjylandyryp jatyr. Sol sebepti basqa xalyqaralyq uıymdar men donor kompanııalarǵa qaraǵanda, biz osy eldegi jaǵdaıdy jaqsy bilemiz. Búginde biz baspasóz betterinde san alýan boljamdardy oqyp júrmiz. Degenmen, bizdiń ekonomıster bolashaqqa optımıstik kózqaraspen qarap otyr. Bizdińshe, búginde Qazaqstan munaı-gaz salasyndaǵy ekonomıkalyq quldyraý kezeńinen ótti. Memleket atalǵan synaqty sátti eńsere bildi. Sondyqtan bıyl ishki jalpy ónim shamamen 0,7 paıyzǵa ósedi degen boljam bar. Al kelesi jyly ol kórsetkish 2,4 paıyzǵa kóteriledi. Bizdiń esebimizge sáıkes, qazirgi kezde ınflıasııa óziniń sharyqtaý shegine jetti. Endi, aǵymdaǵy jyldyń aıaǵyna deıin, sosyn kelesi aıda aqsha men aktıvterdiń aınalymy qalypty deńgeıge oralady», dedi Djanet Hekman.
Konferensııa jumysyna 100 qazaqstandyq jáne agroóndiristik keshen, memleket-jekemenshik seriktestigi, ken-metallýrgııa kesheni, qýat, munaı-gaz jáne bank sektorlary, aqparattyq-kommýnıkasııalyq tehnologııalar, ınnovasııa, kólik jáne logıstıka, taǵam óndirisi, hımııalyq sala, mashına qurastyrý, keme jasaý, medısına jáne týrızm salasyndaǵy qazaqstandyq jáne sheteldik kompanııalardan 300-ge jýyq adam qatysty.
Shara sheńberinde Qazaqstannyń ındýstrııasyna, ınvestısııalyq qyzmettiń keńeıýi men joǵary tehnologııalyq óndiristiń damýyna qosqan úlesteri úshin sheteldik ınvestorlardy jyl saıynǵy marapattaý rásimi ótti. Aıtalyq, Qarashyǵanaq munaı-gaz ken ornyn óńdeý jáne paıdalaný boıynsha «KPO» birlesken kásiporny, «Tenaris» ıtalııalyq qubyr ónimin óndirýshi jáne jetkizýshi, japonııalyq NaýubeniCorporation ýran óndirý, «HeidelbergCement» nemis qurylys materıaldaryn óndirýshisi, ekologııalyq taza otyn damytýmen aınalysatyn «KOLON» ońtústikkoreıalyq kompanııa, «EFKO» reseılik maı óndirýshisi, «Kelun Kazpharm» qytaı farmasevtıkalyq kompanııasy, Qazaqstanda ULKER degen atpen belgili «Pladis» túrik kondıter buıymdaryn óndirýshi kompanııasy marapattaldy. Sondaı-aq, Qazaqstan ekonomıkasynyń damýyna qosqan ınvestısııalyq belsendiligi úshin Eýropa qaıta qurý jáne damý banki jáne Úkimet pen sheteldik ınvestorlar arasynda qatynas ornatýdaǵy úlesi úshin «Sheteldik ınvestorlardyń Qazaqstan keńesi» assosıasııasynyń da eńbekteri baǵalandy.
Investısııalar jáne damý mınıstrligi men «KAZNEX INVEST» eksporttaý jáne ınvestısııalaý jónindegi ulttyq agenttigi muryndyq bolǵan bul konferensııa aıasynda ındýstrııalyq-ınnovasııalyq jobalardyń birtutas kórmesi ótti. Oǵan 70 qazaqstandyq kompanııa men kásipker qatysty.
Dınara BITIKOVA, «Egemen Qazaqstan»
