Beınekonferensııada salyqtyq preferensııalar, qarjylyq sharalar, memlekettik organdardyń memlekettik satyp alýdy júzege asyrý aıasynda sharttyq mindettemelerdi oryndaýy, otandyq aýyl sharýashylyǵy jáne qaıta óńdeý kásiporyndarynan ónimderdi kepildi satyp alý tetikteri, jeńildetilgen qarjylandyrý sııaqty taqyryptar talqylandy.
- Karantın kezeńiniń basynan bastap bizge kóptegen ótinishter kelip túsýde. Biz árbir máselege jeke toqtalyp, qaraımyz. Kún saıyn ortalyq apparatqa mańyzdy suraqtar men máseleni jiberýdemiz. Al ortalyq apparat kelip túsken máselelerdi saralaı otyryp, tıisti sheshimder qabyldaıdy. Kóptegen ótinishterdi ózimiz sheshemiz. Bul negizinen aýdandar men qalalar arasyndaǵy qozǵalysqa baılanysty suraqtar, - deıdi Almaty oblysyndaǵy óńirlik Kásipkerler palatasynyń dırektory Áset Shaıahmetov.
Beınekonferensııada Kásipkerler palatasy óńirlik keńesiniń tóraıymy, isker áıelder keńesiniń jetekshisi, «Almatınskıe kraskı» JShS dırektorlar keńesiniń tóraıymy Rımma Salyqova bıznestiń dál qazirgi kezdegi jaǵdaıyn saralaı kele, memleket pen «Atameken» ulttyq kásipkerler palatasy tarapynan qolǵa alynǵan daǵdarysqa qarsy sharanyń tetikterine toqtaldy.
