Reseıdiń Sibir, Qıyr shyǵystyń qalalary men Qazaqstannyń myńdaǵan oqýshylary baq talasqan olımpıadanyń 3-shi kezeńinen de Dinmuhammed múdirmeı ótti. Aqtyq kezeńge qatysý úshin aǵymdaǵy jyldyń 8-shi naýryzynda Reseıdiń Omby qalasyna baryp, óz bilimin kórsetti. О́tken jyly atalmysh bilim dodasynan ol júldeli 2-shi oryndy ıelense, osy jyly jeńimpaz ataǵyn alyp otyr.
- Olımpıadalarǵa 8-synyptan bastap tyńǵylyqty daıyndalyp, qatysa bastadym, - deıdi Dinmuhammed Orazbaev. - Ásirese bıologııa pánin erekshe jaqsy kóremin. Bolashaqta medısına salasynyń mamany bolǵym keledi. Men Nazarbaev Zııatkerlik mektebiniń oqýshysy bolǵanymdy maqtan etemin. Sebebi osy oqý ordasyna túskennen bastap men ózimniń súıikti pánderimdi tereńdete oqı bastadym. Oǵan qosa, myqty ustazdardan tálim alýdamyn. Sondyqtan osy jetistikterimniń bir úlesi altyn uıamnyń, ustazym ári jetekshim Muhıt Aýtaevqa, sondaı-aq ata-anam men dostarymnyń qoldaýynyń arqasy der edim. Dinmuhammed Orazbaev tórt jyldan beri jelilik, respýblıkalyq olımpıadalardyń jeńimpazy. Sondaı-aq búkilreseılik, búkilsibirlik olımpıadalarda kúmis, qola medal ıegeri atanyp úlgergen. Aıta keterligi, ol naýryz aıynyń sońynda Lomonosov olımpıadasynda júldeli 2-shi oryndy, Búkilreseılik olımpıadada 3-shi oryndy jeńip aldy.
