Búginde kóktemgi dala jumystaryna sapaly tuqymdar daıyndalyp, 560 traktor, 278 tuqym sepkish, 1600-den astam tyrma jáne 150 qopsytqysh qondyrǵylary ázirlengen. Olardyń qatarynda lızıngke satyp alynǵan jańa qondyrǵylar da bar. Aýyl sharýashylyǵy tehnıkalaryn janar-jaǵarmaımen qamtamasyz etý máselesi de oń sheshimin taýyp otyr. Al, kóktemgi dala jumystary úshin 2405 tonna jeńildetilgen dızel otyny qarastyrylǵan. Sol sııaqty Qordaıda mıneraldy tyńaıtqyshtar máselesi boıynsha «KazAzot» AQ jáne «Kazfosfat» JShS-men kelisim jasalǵan.
Kóktemgi dala jumystaryna 81,5 myń gektar aýyl sharýashylyq jerleri daıyndalyp, olarǵa búginde jazdyq arpa, kópjyldyq shópter, kókónis, baqsha daqyldary tolyǵymen egilgen. Maıly daqyldar men júgeri dánin sebý sharalary jalǵasýda. Sonymen qatar, búgingi tańda aýdanda kúzdik bıdaı 22 myń gektarǵa, arpa 42 myń gektarǵa, kópjyldyq shópter men kókónister 8,200 gektarǵa, kartop 3200 gektarǵa egilgen. Kóktemgi dala jumystaryna Qordaı aýdanynan 467 otbasy Shý aýdanyna attansa, budan bólek 117 otbasy pııaz jáne basqa da kókónis daqyldaryn egýmen aınalysatyn kórshiles Almaty oblysyna bet túzegen.
Al, Jambyl aýyldyq okrýgi aýyl turǵyndarynyń tabysyn arttyrý boıynsha pılottyq jobaǵa qatysýda. Mundaǵy sharýalar 8,5 mıllıon teńgege qarjylandyrylǵan «Jańaturmys-Birlik» kooperatıvine birigýde. Atalǵan qarajat tuqymdar, tyńaıtqyshtar jáne ósimdikterdi hımııalyq qorǵaý quraldaryn satyp alýǵa baǵyttalǵan. Joba aıasynda 950 aýla qamtylǵan. Olardyń ıeligindegi 62 gektar aýyl sharýashylyq jerlerine kartop, qııar jáne sábiz egildi. Kooperatıv músheleri 620 tonnaǵa deıin kartop, 434 tonna sábiz jáne 192 tonna qııar alýdy josparlaýda.
Jambyl oblysy
