24 jasar Saıda osy mamandyǵyn ózi tańdaǵan. Anasy da - mal dárigeri. Jas mamannyń hobbıi de bar. Bos ýaqytynda tyrnaq árleıdi.
– Janýarlar qaı jeri aýyryp turǵanyn aıtyp, shaǵymdana almaıdy ǵoı. Aýrýdyń belgilerin qarap emdeımiz. Alǵash ret iri qaradan qan alǵanym esimde. Qorqynyshty boldy. Mal dárigeri mamandyǵyn tańdaǵan sebebim-bala kezimnen anamnyń jumysyna qarap qyzyqtym. Qazir mal dárigeri mamandyǵyn ıgerip, jumys istep jatyrmyn. 2 jyldan asty. Tańdaýyma esh ókinbeımin, – deıdi mal dárigeri Saıda Zakırıanova.
Keıipkerimiz jumys isteıtin veterınarlyq stansııada 7 adam jumys isteıdi. Aralaryndaǵy jalǵyz arý-Saıda. Er minezdi keıipker esh jasqanbaı, usaq maldarǵa ekpe jasap, tańbalaıdy. Bul salaǵa kelgenine eki jyl bolypty.
– Bizdiń veterınarııalyq stansııada tájirıbeden ótip, jumysqa qabyldandy. Yntasy zor. Bizdiń salaǵa jastar kele qoımaıdy ǵoı. Saıda er azamattardan qalyspaı ekpe jasap júr. Kúzge deıin 4 myńnan asa iri qara men 10 myńǵa jýyq usaq malǵa vaksınasııa jasalýy tıis, – deıdi qalalyq veterınarııa stansııasynyń dırektory Erkin Esilbaev.
«Medısına adamdy, al, veterınarııa adamzatty emdeıdi» degen qanatty sóz bar. Adamzatty emdep júrgen arýdyń isine adam qyzyqqandaı.
Kókshetaý qalasy
