Deı turǵanmen, aýdanda birqatar máseleler de bar. Aıdarly aýylyndaǵy №2 orta mektepte mektepke deıingi balalarǵa arnalǵan «Balapan» shaǵyn ortalyǵy jumys isteıdi. Alaıda, ǵımarat 50 jyldan astam ýaqyt boıy kúrdeli jóndeý kórmegen. Jambyl oblysynyń ákimi Berdibek Saparbaev ta Moıynqum aýdanyna jumys sapary barysynda Aıdarly aýylynda bolyp, atalǵan máselege nazar aýdardy. Atalǵan bilim oshaǵynda bilim kórsetkishi oıdaǵydaı. Mundaǵy lıngvıstıkalyq, aǵylshyn jáne robototehnıka kabınetterimen tanysqan ákim mektep túlekterimen baılanystyń oń jolǵa qoıylmaǵanyn aıtty. Bul oraıda mekteptiń ákimshiligi túlekterdi mektep tirshiligi men máselelesine barynsha tartýǵa yqpal etetin «Tulek.kz» saıtyna tıisti deńgeıde mán bermeı otyrǵandyǵyn jetkizdi. Endi bul mekteptiń máselesi qalaı sheshiledi? Oblys ákimshiligi tarapynan qandaı kómek bar? Bul oraıda Berdibek Saparbaev bilim oshaǵynyń kúrdeli jóndeý jumystaryna kómektesýge ýáde berip, aýdan ákimi Máden Musaevqa nysannyń jobalyq-smetalyq qujattaryn ýaqyt sozbaı daıyndaýdy tapsyrdy.
Búgingi tańda Jambyl oblysynda halyqtyń turmysyn arttyrýǵa arnalǵan pılottyq joba júzege asýda. Biraq, atalǵan jobanyń shalǵaı aýyldarda oryndalýy qandaı deńgeıde? Moıynqum aýdany, Keńes aýyldyq okrýgine qarasty bir ǵana Aıdarly aýylyna bul maqsatqa 630 mıllıon teńge kóleminde qarajat qarastyrylǵan. Pılottyq joba aıasynda 1708 bas mal satyp alynǵan. Alaıda, turǵyndar olardan óndirilgen sútti ótkizetin jerdiń joqtyǵyn aıtyp shaǵymdanýda. Sonymen qatar, Aıdarly aýylynyń turǵyndary aýyz sýdyń sapasyna da narazylyqtaryn bildirýde. Olardyń aıtýynsha, sý quramynda ftor qosyndysy kóp. Sondaı-aq, aýyldyqtar Mádenıet úıi qurylysyna qatysty da másele kótergen bolatyn. Endi bul máseleler óńir basshylyǵy tarapynan qalaı sheshiledi degen másele turǵyndar úshin ózekti. Pılottyq joba boıynsha alynǵan maldyń sútin ótkizý máselesine Berdibek Saparbaev óz pikirin bildirdi. Ol Shý aýdanyndaǵy kásipkerlerdiń birinde turǵan sút óńdeıtin modýldi sehty osy iske jumyldyrýdyń mańyzdylyǵyna nazar aýdaryp, Máden Musaevqa bul máseleni jan-jaqty qarastyrýdy tapsyrdy.
Moıynqum aýdanyndaǵy Birlik aýylynyń kireberisinde blok-beket ornalasqan. Bul jerden kúnine 150-200 adam ótedi. Munda 4 polısııa, 2 medısına qyzmetkeri men 2 sanıtar maman jumys isteýde. Birlik aýyly Halyq Qaharmany Qaırat Rysqulbekovtiń týǵan jeri. Berdibek Saparbaev batyrdyń aýylyna da atbasyn buryp, blok-bekettiń jaıymen jáne jalpy aýyldyń ahýalymen tanysty. Bir kezderi Birlik aýyly aýdannyń ortalyǵy bolǵan. Sol kezden qalǵan aýyldaǵy úlken aýrýhana búginde dárigerlik ambýlatorııaǵa aınalǵan. Munda búginde jalpy sany 20 adam eńbek etedi. Onyń ishinde 2 dáriger, 16 ekinshi býyn medısına qyzmetkeri bar. Bul nysandar kórshiles Hantaý, Bınazar, Aıdarly syndy úsh eldi mekenniń turǵyndaryna da qyzmet kórsetedi. Atalǵan emdeý mekemesiniń bir korpýsy jóndeýdi talap etedi. Al, Berdibek Saparbaev bul máseleni sheshý úshin, kommýnaldyq shyǵyndardy azaıtý úshin ambýlatorııanyń bir bóligin basqa maqsatqa paıdalaný kerektigin, jergilikti halyqtyń qajettiligin eskerip, munda qandaı mekemeni ornalastyrýǵa bolatynyn aýdan ákimi jan-jaqty oılastyrýy kerektigin jetkizdi. Aýdandaǵy munan ózge de máseleler saralandy. Keıbir áleýmettik máselelerdi sheshýdiń joldary da qarastyryldy.
Jambyl oblysy
