«Dostar, qýanyshty jańalyqpen bóliskim keledi! Búgin stasıonardan COVID -19 indetine shaldyqqan 1000-shy naýqas emdelip shyqty. Ol Qyzylorda oblysynda emdelip jatqan 30 jastaǵy adam. Ol Qyzylorda oblystyq juqpaly aýrýlar aýrýhanasyna 16 sáýirde koronavırýs ınfeksııasyn juqtyrǵan adammen baılanysta bolǵandyqtan túsken bolatyn. Onyń jaǵdaıy ortasha aýyr bolǵan. Dene qyzýy 38 gradýsqa deıin kóterilip, qurǵaq jótel jáne álsizdik bilindi. Onyń ókpesin rentgenge túsirgen kezde sol jaq ókpesiniń ınterstısıaldy qabynýy bolǵany anyqtaldy», - dep jazdy Eljan Birtanov.
Mınıstrdiń aıtýynsha naýqasqa «COVID-19 koronavırýs ınfeksııasy, sol jaq ókpeniń qabynýy, ortasha aýyr deńgeı» dıagnozy qoıylǵan.
«COVID-19-dy emdeý jáne dıagnostıkalaý protokolyna sáıkes em-dom júrgizildi. Emdelgennen keıin araǵa 24 saǵat salyp eki ret koronavırýsqa zerthana tekserý jumysy júrgizildi. Test nátıjesinde koronavırýstan emdelgeni anyqtaldy. Stasıonardan shyǵar kezde eshqandaı shaǵymy bolǵan joq. Dárigerler ony 21 kún úıde karantınde otyrý usynymymen shyǵardy. Men aldyńǵy shepte júrgen dárigerlerge alǵys aıtqym keledi. Jaraısyzdar! Rahmet!», - dep jazdy mınıstr.
