Germanııa federaldyq saılaý komıssııasynyń qorytyndysy boıynsha, Angela Merkel basqaratyn «Hrıstıan demokratııalyq odaǵy» parlamenttik saılaýda jeńiske jetti. Bul týraly RIA «Novostı» habarlady.
Saılaý qorytyndysy boıynsha, Angela Merkel odaǵy 41,5 paıyz daýys jınady. Bul Batys pen Shyǵys Germanııa qosylǵaly beri eń joǵary kórsetkish bolyp otyr. Partııalyq tizim boıynsha «Germanııa áleýmettik demokratııalyq partııasy» 25,7, «solshyldar» 8,6, al «jasyldar» 8,4 paıyz daýys jınaǵan. Sondaı-aq, saılaýǵa qatysqan «Erkin demokratııalyq partııasy» 4,8 paıyz daýys jınap, jańa parlamentke kire almaı qaldy. Sebebi, Býndestag quramyna kirý úshin saılaý qorytyndysy boıynsha, kem degende 5 paıyz daýys jınaý kerek bolatyn. «Erkin demokratııalyq partııasy» 50 jyldan astam ýaqyt ishinde Býndestag quramyna birinshi ret enbeı qalyp otyr.
Aıdar О́risbaev.
