Qytaıdyń ońtústigindegi Gýandýn provınsııasynda «ýsagı» taıfýny 21 adamnyń ómirin qıdy. Bul týraly ITAR-TASS habarlady.
Meteorologtardyń aıtýynsha, jeldiń jyldamdyǵy saǵatyna 180 shaqyrymǵa jetken.
Shantoý qalasynda aǵash qulap túsip, eki adamdy basyp qalǵan. Al «Sınhýa» agenttigi taratqan aqparda Hýeılaı ýezindegi qatty jelden synǵan tereze áınekteriniń biri turǵynnyń ústine túsip, onyń qaza bolǵanyn, sondaı-aq, iz-tússiz joǵalǵandardyń bar ekeni de jazylǵan.
Ońtústik Qytaıdyń birneshe aýdanynda elektr jelisi úzilgen jáne Beıjiń men Ońtústik Qytaıdy jalǵap turǵan «Gýanchjoý-Beıjiń» temirjolyndaǵy qozǵalys ýaqytsha toqtatyldy. Gonkong áýejaıynda 370-ten asa áýe sapary keıinge qaldyryldy. Jaǵalaýǵa jaqyn 14 qalanyń mektepteri jabyldy.
«Ýsagı» japon tilinen aýdarǵanda «qoıan» degen maǵynany bildiredi eken. «Ýsagı» Azııa aýmaǵynda ústimizdegi jyly oryn alǵan eń iri daýyl sanalyp otyr. Ol Qytaıǵa deıin Fılıppın aýmaǵynda oryn alyp, eki adamnyń ómirin julyp ketken. Gonkong «ýsagıdi» sońǵy jarty ǵasyrdyń ishinde oryn alǵan eń iri taıfýn retinde baǵalap otyr.
Aıdar О́risbaev.
