Elimizdegi janarmaı qorynyń jaqyn kúnderde taýsylyp qalatyn túri bar. Osynyń saldarynan taıaý kúnderi respýblıkada AI-92 markaly benzın men dızel otynynyń baǵasy kúrt sharyqtap ketýi ábden yqtımal. Bul týraly «Astana» telearnasy habarlady.
Tilshiniń aıtýynsha, tipti janarmaıdyń múldem joǵalyp ketýi de ǵajap emes. Osy rette janarmaı qaýymdastyǵy ókilderi: «Bólshek saýda ıeleri sońǵy tórt aıda qajetti deńgeıdegi munaı ónimderine qol jetkize almaı otyr»,- dep qynjylady. Olar bul máseleniń ózderi tarapynan birneshe ret kóterilgenin de aýyzǵa alyp otyr.
Rasynda da kórshiles elden jetkizilýi tıis 234 myń tonna suıyq otynnyń ózi janarmaı tapshylyǵyn sheshe almaıdy. Aıta keteıik, buǵan deıin Munaı jáne gaz mınıstrliginiń buıryǵymen otandyq úsh kompanııa ǵana Reseıden munaı ónimderin jetkizýshi operator bolyp belgilengen bolatyn.
«Eger suıyq otyn bolmasa, janarmaı beketteri ony talon nemese kartochkamen saýdalaıdy. «Qazmunaıgazdyń» janarmaı beketinde keptelis týyndaıdy. Az ýaqytta olardaǵy janarmaı da taýsylady. Biz munyń aldyn alǵymyz keledi», - deıdi «Qazaqstannyń janarmaı qaýymdastyǵy» basqarma tóraǵasy Bolat Áýetaev.
Tasymaldaýshy operatorlar Pavlodar munaı óńdeý zaýytynyń jetkilikti deńgeıde suıyq otynmen qamtamasyz etilmeı otyrǵanyn alǵa tartady. Olar janar-jaǵarmaıdy Reseıge qarasty Petropavlovsk stansasynan avtokólikpen jetkizip otyrǵan kórinedi. Bul óz kezegende onsyz da qymbat bolyp tabylatyn janar-jaǵarmaı baǵasynyń sharyqtaýyna ákep soqtyrýda. Munaı óniminiń az kólemde tasymaldanýy saldarynan, qazirdiń ózinde qaýymdastyq músheleriniń kópshiliginde dızeldi otynnyń az qory qalypty.
«Biraz kúnde onyń ózi taýsylady», - dep alańdaıdy mamandar. Al Shymkenttegi munaı óńdeý zaýyty qaıta jóndeýden ótkiziletindikten, jaǵdaıdyń ýshyǵyp ketýi de ǵajap emes.
Qurysh Nurymbet.
