Qazirgi qoǵamdaǵy dushpanyńa da tilemeıtin aýrýdyń biri – adamnyń ımmýn tapshylyǵy vırýsy, ıaǵnı «VICh» juqpasy. Buryn bul syrqat kóbine esirtkiqumarlar men jeńil júristilerde kezdesse, qazir ol adam talǵamaıtyn bolǵan. Medısına mamandarynyń aıtýynsha, bul indet ınfeksııa juqtyrǵandardyń jeke bas qaıǵysyna aınalmaýy tıis, oǵan kópshiliktiń nazaryn aýdartý qajet. Búginde oblys boıynsha 735 adam VICh ınfeksııasyn juqtyrǵan degen derek bar.
– Naýqastardy biz tirkeýge alyp, memleket esebinen emdeımiz. Olarǵa jańa dári-dármekter de beriledi. Máselen, bıyl naýqastar osy dárilerdiń arqasynda óz densaýlyqtaryn biraz jaqsartyp aldy. Jalpy, VICh ınfeksııasyn emdeıtin dáriler óte qymbat. Biraq olardyń barlyǵy memleket esebinen satyp alynady,–deıdi oblystyq SPID-pen kúresý jáne onyń aldyn-alý ortalyǵynyń bas dárigeri Qurmanbek Burmaǵanov.
О́tken jyldyń osy merziminde qaýipti indetti juqtyrǵan 45 azamat tirkelgen. Dárigerlerdiń aıtýynsha, sońǵy jyldary VICh-ınfeksııasy beı-bereket jynystyq qatynas arqyly taraýda. Adamnyń aǵzasyn ımmýn tapshylyǵyna ushyratatyn derttiń daýasy búginge deıin tabylmaı tur.
