«El ishi – óner kenishi» degen ataly sóz tegin aıtylmaǵan. Tek osy ýaqytqa deıin býlyǵyp jatypty. Qaınar bulaqtyń kózin ashqan, shalǵaıdaǵy sheberlerge dem bergen, jalaýyn jelbiretken Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynyń serpini. Sary saǵymǵa oranǵan shalqar dalanyń tósindegi zamandastarymyzdyń kókiregindegi qyzdyń jıǵan júgindeı qattalyp jatqan kórkem dúnıede sál-pál ǵana ósirip aıtqanda, shek joqtaı. Neshe túrli zattan jasalǵan áralýan buıymdar. Has sheberdiń qaıtalanbas ǵajaıyp týyndysy ispetti. Qarap turyp shyn sheberler aýylda jatyr eken ǵoı der edińiz. Teriden, aǵashtan, balshyqtan jasalǵan qanshama buıym. Birinen-biri ótedi, birinen-biri qyzyq. Qaısysy bolsyn kóz tartyp, kóńil arbap tur.
Eń alǵash kópshilik nazaryna usynylǵan qoldanbaly-sándik týyndalarynyń kórmesi Jaqsy aýylyndaǵy mádenıet úıine qoıylǵan 2018 jylǵy kórmeden bastalǵan. Aýdannyń ár eldi mekeninde turatyn 33 sheberdiń 300-den astam eńbegi kórermendi tań-tamasha qaldyrǵan. Jaqsynyń jalpaq dalasynda tap osynshalyq kókiregi oıaý, qoly sheber adamdar turady dep buryn-sońdy oılamaǵan da bolar. Jasampaz jarqyn ómirdi beıneleıtin keskinnen tula boıyńa beımálim jylý taraıtyndaı. Kóńilińe qýanysh sazyn darytatyndaı.
Ár sheberdiń eńbegi jeke-jeke baǵalanyp, jetistigi aıtylǵan. Osy jerde tájirıbeli sheberlerdiń sheberlik synyptary da ótkizildi. Talaptylar ǵana emes, kórermenniń ishindegi qoly epsektileri de qatysyp, qyr-syryn uǵynǵan. Sóıtip Jaqsynyń jaqsy isi at tuıaǵy jetetin aýmaqqa tegis tarady. Atbasar, Esil, Jarqaıyń aýdandaryna kóshpeli kórme uıymdastyrylyp, ónegeniń órisi keńeıe tústi. Keıin «Aqmola juldyzdary» halyq shyǵarmashylyq oblystyq kórmesine qatysyp, talanttylardyń tálimdi isi talaıǵa belgili boldy. Oblys ortalyǵynyń turǵyndary da shalǵaıdan kelgen shyǵarmalardyń shyraıyn joǵary baǵalady.
Osy joba sheńberinde derekti fılm túsirildi. El ishindegi ónerliniń óz eńbeginen qanaǵat taýyp, kókiregi maqtanysh sezimi kerneıtin sát týdy. Olar da qanattanyp, marqaıyp qaldy. Talaı talant ıesine qýanysh syılaǵan joba áli de jalǵaspaq. Jaqsydaǵy jaqsy óner ótken tarıhtyń óńin ýaqyt tozańynan arshyp alyp, keıingi jasqa ónege etýmen qatar, bolashaqtyń baǵdaryn aınytpaı silteıtin temirqazyq ispetti dúnıe. О́ıtkeni sheberlerdiń oıyn onǵa, sanasyn segizge bólip, boıyndaǵy bar bilim-biligin sarqa jumsap jasaǵan dúnıeleriniń jalpy mazmuny zamandastarymyzdyń boıyndaǵy qundylyqtardy bir arnada jınaqtap, ortaq rýhanı baılyqty eseleı túsedi.
Aqmola oblysy,
Jaqsy aýdany
