Qazirgi ýaqytta túrli portaldar men memlekettik organdardyń kabınetteri azamatty sáıkestendirý jáne qyzmetterdi alýǵa berilgen ótinishterge qol qoıý úshin elektrondyq sıfrlyq qoltańbany (ESQ) talap etedi. Olardyń ishinde – Salyq tóleýshiniń kabıneti, Sot kabıneti, Memlekettik satyp alý portaly jáne basqalary bar. QR-kod arqyly avtorızasııalaý servısin engizý atalǵan resýrstardy paıdalaný prosesin jeńildete túspek.
«Qazirgi kezde bári smartfon paıdalanady. Azamattar eGovmobile qosymshasyn barlyq memlekettik saıttar men portaldardy ashatyn kilt retinde qoldana alar edi. Ol úshin qosymsha arqyly QR-kodty skanerleý jetkilikti. ESQ-ny kompıýterde paıdalaný úshin qosymsha soft ornatýdyń da qajeti bolmaıdy», - dep atap ótti Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev.
Avtorızasııalaý prosesiniń osyndaı balamasy elektrondyq úkimet portalynda iske asyryldy. Azamat «QR-kod boıynsha avtorızasııalanýdy» tańdap, QR-kodty eGovmobile qosymshasy arqyly skanerleýi kerek. Qosymshaǵa engizilmegen memlekettik qyzmetterdi atalǵan prınsıp boıynsha aldaǵy maýsym aıynda alýǵa bolady.
«Azamattardyń memlekettik qyzmetterdi ońaı ári yńǵaıly alýy úshin ótinimderge qol qoıý mehanızmin QR-kodty eGovmobile qosymshasy arqyly oqý prosesin júzege asyrý jumystary júrgizilýde», - dedi «UAT» AQ Basqarma tóraǵasy Áset Turysov.
Memlekettik qyzmetterdi avtomattandyrý jáne ońtaılandyrý jónindegi vedomstvoaralyq komıssııanyń otyrysy turaqty túrde, aıyna birneshe ret ótkiziletinin aıtyp ótken jón. Osy kezdesýler sheńberinde memlekettik organdar kórsetiletin qyzmetterdi avtomattandyrý jáne ońtaılandyrý úshin jańa bıznes-prosesterdi talqylap, pysyqtaıdy.
