Ýnıversıtet ujymy men stýdentteri jáne bıylǵy mektep bitirýshi túlekter qatysqan jıynda álemdegi biregeı bilim ordasynyń ózindik erekshelikteri, QyzPÝ-dyń 75 jyldyq tól tarıhyndaǵy qol jetken eleýli tabystary men búginde júzege asyrylyp jatqan júıeli jumystar kópshilik nazaryna usynyldy.
Jıyndy Qyzdar ýnıversıtetiniń qoǵamdyq uıymdarmen jumys júrgizý jónindegi úılestirýshisi Álibı Nesipbaev ashyp, sharanyń máni men mańyzyna toqtaldy.
– Semınardyń basty maqsaty –«Elbasynyń bes áleýmettik bastamasy» baǵdarlamasynda kórsetilgen mindetterdi naqty iske asyrý. Qazirgi kúnde álemde tek qana qyzdar bilim alatyn joǵary oqý oryndary saýsaqpen sanarlyqtaı. Osy oraıda ýnıversıtet óziniń biregeıligimen «Qyzdar ýnıversıteti» degen brendin qalyptastyrdy. Bizdiń kózdegenimiz – osy ýaqytqa deıin qol jetkizgen tabystardy eseleı túsý, qazynaly qarashańyraqty shyqqan bıiginen túsirmeý.Halqymyzda «Ultyńdy tárbıeleımin deseń – qyzyńdy tárbıele» degen ulaǵatty sóz bar. Ýnıversıtet ujymy óz qyzmetinde osy ustanymdy basty baǵdar retinde ustanady. Bul – izgilikke negizdelgen qoǵam qurýdyń bastaýy dep túsinemiz, – dedi Álibı Nesipbaev.
Sondaı-aq basqosýda oqý ornynyń Áleýmettik damý jónindegi prorektory Jańagúl Sultanova sóz sóılep, ýnıversıtettiń parasatqa toly tarıhyna, júrip ótken jolyna sholý jasady.
– Bilim ordasynyń ashylýyna Muhtar Áýezov, Qanysh Sátpaev, Ilııas Omarov, Nurtas Ońdasynov, Ǵabıt Músirepov syndy ult zııalylary uıytqy bolyp, qoldaý kórsetti. Halqymyzdyń daraboz perzentteri oqý ornynyń odan ármen damýyna muryndyq boldy. О́tkenge sheginis jasaıtyn bolsaq, Qyzdar ýnıversıtetine qazaqtyń dańqty ǵalymdary basshylyq jasap, oqý ornynyń damýynda óz qoltańbalaryn qaldyrǵanyn baǵamdaımyz. Bul bilim ordasy kóptegen túlekter úshin alma-mater. Osy ýaqyt aralyǵynda oqý ornyn myńdaǵan bilikti pedagogtar, tarıhshylar, mádenıet salasynyń qyzmetkerleri men til mamandary bitirdi. Búginde kıeli shańyraqtan shyńdalyp shyqqandar Otanymyzdyń damýy jolynda jemisti qyzmet atqarýda, –dep atap ótti Jańagúl Sultanova óz sózinde.
Shara barysynda Jastar isi jónindegi komıtet tóraıymy Dılıara Nadırhanova «Qyzdar ýnıversıteti stýdentiniń bir kúni», «Ulpan» ashanasynyń dırektory Úmit Júnisalıeva «Aptasyna 7 kún, kúnine 3 mezgil», Dene shynyqtyrý jáne sport kafedrasynyń aǵa oqytýshysy Maqsutqan Shynybaev «Ýnıversıtettiń sport klýbtary», «Sán álemi» ortalyǵynyń jetekshisi Uljan Alashabaeva «Stıl sánge qaraǵanda mańyzdy» jáne Stýdentter úıiniń stýdenttik keńes múshesi Gúlbaný Dıhanbaeva «Ýnıversıtet jataqhanalarynyń tynys-tirshiligi» taqyryptarynda tanymdyq aqparattarymen bólisip, osy baǵyttarda keńinen málimetter berdi.
Aıta keteıik, Qyzdar ýnıversıteti bakalavrıat, magıstratýra jáne PhD doktorantýra bilim baǵdarlamalary boıynsha pedagog kadrlaryn daıarlaıdy. Búginde oqý ornynda 400-ge jýyq joǵary sanatty professor-oqytýshy qyzmet atqarady. Olardyń basym bóligin bilikti ǵylym doktorlary men professorlar, ǵylym kandıdattary men dosentter, PhD doktorlary men magıstrler quraıdy.
Arýlar ordasy – Qazaq ulttyq qyzdar pedagogıkalyq ýnıversıtetine tıesili 7 jataqhana bar. Oqý orny qalashaǵynda ornalasqan jataqhanalar janǵa jaıly ári qolaıly. Onda fıtnes zaldary, sulýlyq salondary, oqý zaldary, kir jýatyn bólmeler men ǵalamtor jelisine qosylǵan kompıýter synyptary bar.Zamanaýı úlgidegi jataqhanalarda stýdenttiń alańsyz sapaly bilim alýyna tolyqqandy jaǵdaı jasalǵan.
Ýnıversıtettiń dańqy tek bilim men ǵylymda ǵana emes, sondaı-aq túrli deńgeıdegi sporttyq jarystarda da jıi shyǵyp keledi. Qazirgi tańda oqý ornynyń basketbol, voleıbol, shaǵyn fýtbol qurama komandalary kóptegen halyqaralyq, respýblıkalyq týrnırlerde úzdikter qatarynda, kósh basynda.
QyzPÝ-da stýdentterdi úsh mezgil tamaqpen qamtamasyz etetin «Ulpan» ashanasy, «Aqqý» basseıni, sport keshenderi, zamanaýı quraldarmen jabdyqtalǵan zerthanalar men dárishanalar bar.
ALMATY
