Aımaqtar • 22 Mamyr, 2020

Kókshetaýda jańa kirpish zaýyty salynýda

34 ret kórsetildi

Kókshetaýdaǵy «Enkı» kirpish zaýyty qýattylyǵyn 50 prosentke arttyrmaq. Osyǵan deıin qaptyrmaly qysh kirpish óndirisin myqtap jolǵa qoıǵan kásiporyn búginde qarapaıym kirpish shyǵaratyn jańa zaýyttyń qurylysyn bastap ketti. 

Jańa zaýyt jyl sońyna deıin iske qosylady dep josparlanǵan. Alaıda, bul jospardyń iske asýyna qarjylaı kedergiler de joq emes. «Enkı» kirpish zaýyty Qazaqstanda ǵana emes, Orta Azııadaǵy irgeli zaýyttardyń birinen sanalady. Kásiporyn jylyna 60 mıllıon kirpish óndiredi. Ári jyl ótken saıyn satylym aýmaǵyn keńeıtip, jańa ónim túrlerin kóbeıtip keledi. Naryqtaǵy suranysqa oraı kásiporyn bıyl qarapaıym kirpish shyǵaratyn jańa zaýyttyń qurylysyn bastap ketti.

–Byltyr qýattylyǵy jylyna 30 mıllıon kirpish bolatyn jańa zaýyttyń qurylysyn josparlaǵan bolatynbyz. Búginde bul jumys bastalyp ketti.  Jospar boıynsha jyldyń aıaǵynda iske qosylýy tıis. Biraq,  qarjylaı qıyndyqtarǵa tap bolyp otyrmyz. Sondyqtan, qurylystyń naqty qashan aıaqtalatynyn dóp basyp aıta almaımyz,- deıdi zaýyttyń bas ınjeneri Marat Kesekpaev.

Qazirde zaýyttyń syrtqy qańqasy daıyn. Qarjylaı qıyndyqqa baılanysty qurylys qarqyny sál báseńdegen. Jalpy, Kókshetaýdyń qamtama kirpishi Qazaqstannyń barlyq óńirlerinde úlken suranysqa ıe. Endi qarapaıym kirpish óndirisi iske qosylsa, zaýyttyń qýattylyǵy 50 prosentke arta túsedi. Qazirde jańa zaýytqa qajet qondyrǵylarǵa tapsyrys berilgen. Olardyń birazy jetkizildi.

–Jańa zaýytta kirpishtiń birneshe túri shyǵarylady. Shamamen, 75-80 jańa jumys orny ashylady,–deıdi óndiris sehynyń bastyǵy Erlan Shákenov.

Otandyq óndiris ósip-órkendese, elimiz ımportqa degen táýeldilikten arylady. Sondyqtan óńirdegi zaýyt naryqtaǵy suranysty tolyq qanaǵattandyrýdy oılaıdy. Qarapaıym kirpish óndirisin jolǵa qoıý sol maqsattan týyndap otyr.

Sońǵy jańalyqtar

Aq úıdiń alǵashqy meımany

Álem • Búgin, 12:15

ShQO-da mal urylary ustaldy

Aımaqtar • Búgin, 11:00

Uqsas jańalyqtar