Sýretti túsirgen Erlan Omar, EQ
Qazaqstan stýdentteri Alıansynyń tóraǵasy Ilııas Tústikbaev kez kelgen azamattyń ózi oqyǵan ne oqyp jatqan bilim ordasy týraly saýaldamaǵa qatysa alatynyn habarlady. Bilim alýshylar men túlekterdiń jaýaptary ýnıversıtetterge berilmeıdi, ıaǵnı qupııa saqtalady.
«Bul reıtınginiń maqsaty – joǵary oqý oryndarynda bilim alýshylar men túlekter tarapynan táýelsiz baǵa berý, abıtýrıentterge, jumys berýshilerge tolyqqandy aqparat pen kásiptik baǵdar berý. Munyń memlekettik uıymdardyń resmı reıtıngisine qaraǵanda ereksheligi – saýaldamanyń anonımdi ótýinde. Anonımdik saqtalatynyn biletin qatysýshy barynsha ashyq ári shynaıy jaýap berýge tyrysady. Sonyń negizinde jasalǵan reıtıng ýnıversıtetterge de jumysyndaǵy olqylyqtardan habardar bolýǵa múmkindik beredi. Jaýapty negizge alyp jumys sapasyn arttyrýǵa tyrysady degen úmittemiz. Bilim jáne ǵylym mınıstrligi men joǵary oqý oryndaryna usynystar ázirleý de josparda bar. О́zim Prezıdent janyndaǵy Jastar keńesiniń múshesi retinde keńes jınalysynda da jarııalasam degen josparym bar», deıdi Alıans tóraǵasy.
Saýaldama suraqtary joǵary oqý oryndarynyń bilim berý baǵdarlamasy, materıaldyq-tehnıkalyq bazasy, sybaılas jemqorlyq, jataqhana, tamaqtaný oryndary, rektorattyń ashyqtyǵy sııaqty birneshe baǵyttardy qamtıdy. Osylaısha, oqý oryndarynyń tek bilim berý sapasy emes, stýdentterge jasalǵan jaǵdaı da, sabaqtan tys ýaqytty tıimdi ótkizýge arnalǵan múmkindikter de saralanady.
«Azamattardan bul jobaǵa belsene aralasýyn ótinemiz. Bul jobada ár adamnyń pikiri mańyzdy. Saýaldamaǵa Qazaqstan stýdentteriniń Alıansynyń áleýmettik jelilerdegi paraqshalary arqyly qatysýǵa bolady. Bul ýnıversıtetterge stýdentterdiń kózimen baǵa berý ekenin eskergen jón», dep túıindedi Ilııas Tústikbaev.
Bir aıǵa sozylatyn saýaldama stýdentter tarapynan ázirlenip jatqan alǵashqy reıtıng. Buǵan deıin joǵary oqý oryndarynyń jumys sapasyn «Bilim sapasyn qamtamasyzdandyrý boıynsha táýelsiz agenttigi» men «Akkredıtteý jáne reıtıngtiń táýelsiz agenttigi» uıymdary baǵalaıtyn.
