Bul kisi zamanynda jańasha oqyǵan saýatty adam bolypty. El shejiresin jatqa bilýimen qatar, kúı tarıhyna qatysty mol maǵlumattardy tereń meńgergen. Atasy Táttimbettiń qyryqtan astam kúıiniń qalaı shyqqany, olardy kimderdiń shertkeni týraly Jaqsymbet pen ákesi Musataıdan jáne basqa da biletin adamdardan estigenin jadynda berik saqtaǵan eken.
Shaıqy Musataıuly 1892-1897 jyldary Qarqaraly aýylsharýashylyq mektebinde oqyp, bilim alypty. Qarqaraly okrýgindegi Dastar elinde bolys bolǵan degen de derek bar.
Tektiniń tuqymy 1928 jyly tárkilenip, Semeıge jer aýdarylǵan. Keıinde, ıaǵnı 1966 jyly Qarqaralyǵa kelgen saparynda osy sýrettegi dombyrasyn Táttimbet kúılerin nasıhattaýshy, kúıshi, týysqany Turysbek Túsipbekovke beripti. «Bul dombyrany qazirgi ýaqytta el astanasynda turyp jatqan Turysbek kúıshi 1980 jyly Qarqaraly murajaıyna tapsyrǵan», deıdi Qarqaraly tarıhı-ólketaný mýzeıiniń kishi ǵylymı qyzmetkeri Sátbek Slambekov.
Shaıqy Musataıuly 87 jasyna qaraǵan shaǵynda Aıagóz qalasynda qaıtys bolǵan.
Qaraǵandy oblysy,
Qarqaraly qalasy
