– Eńbek Kodeksine 131 ózgerister men tolyqtyrýlar engizildi. Atap aıtsaq, 67 bap ózgertilip, 41 talap jańardy. Osy ózgeristerdi halyqqa túsindirý maqsatynda Eńbek ınspeksııasy jáne kóshi-qon basqarmasy, «Shymkent qalasy kásipodaqtar ortalyǵy» aýmaqtyq kásipodaqtar birlestigi jáne Shymkent qalasynyń kásipkerlik palatasymen birlese jumystar júrgizilýde. Osyǵan baılanysty 140 iri mekemege, onyń ishinde 65 memlekettik mekemege jáne 75 jeke mekemege hat joldandy. Qazirgi tańda kásiporyn basshylyqtary túsindirý jumystaryna daıyn ekendikterin habarlap, soǵan sáıkes mekemelerdiń kestesi jasaqtalýda. Al karantın aıaqtalǵannan soń, basqarmanyń memlekettik eńbek ınspektorlary tarapynan aqparattyq-túsindirý jumystary júrgiziledi, – dedi Baýyrjan Ahmetáliuly.
Aıta ketsek, atalǵan Zań eńbek sharttaryn túzý jáne esepke alý prosesin avtomattandyrady. Osyǵan baılanysty «eńbek sharttaryn esepke alýdyń biryńǵaı júıesin» jáne eńbek salasynda jumysshylardyń quqyqtary men bostandyqtaryna shekteý jasaý faktiler boıynsha jumysshylardy jaýapkershilikke tartý normasy engizilgen. Sondaı-aq buryn jumysshyny áskerı qyzmette boryshyn óteýge shaqyrtýlar eńbek shartyn toqtatýǵa negiz bolǵan bolsa, qazir jumys berýshige azamattyń jumys ornyn saqtaýdy mindetteýdi qarastyrady.
Oǵan qosa, eńbek shartynda jumysshymen kelisim boıynsha habarlama bermeı-aq, ótemaqy tólemin júrgizip, jumys berýshige eńbek shartyn toqtatýǵa múmkindik bergen 50-baptyń 3-tarmaǵy alynyp tastalǵan. Bul rette eńbek qaýipsizdigi jáne eńbekti qorǵaý jóninde áleýmettik áriptestik salasynda naqtylaý sıpatyna ózgeris engizilgen.
