«Búgin Prezıdent Qasym-Jomart Toqaev óz úndeýinde saıası qýǵyn-súrgin qurbandaryn aqtaý jónindegi memlekettik komıssııanyń qurylǵandyǵyn jarııa etti. Bul - tarıhı ádildikti qalpyna keltirý isindegi elimizdiń kezekti qadamy. Sol jyldardaǵy qýǵyn-súrgin - tarıhymyzdaǵy jazylmaǵan jara», - degen Dáýren Abaev prosesterdiń jabyqtyǵy, qupııalyǵy kóptegen aqtańdaq qaldyrǵanyn, kinásiz qýǵyn-súrginge ushyraǵandardyń barlyǵy birdeı aqtalmaǵanyn atap ótti.
«Halqymyzdyń quqy úshin de kúreskenderdi aqtaýǵa tıispiz. Máselen, 1910-1930 jyldardaǵy halyq kóterilisine qatysýshylardy aıtalyq, 1929 jylǵy Batpaqqara kóterilisine qatysqan 500 adamnyń tek úsheýi ǵana aqtalǵan. Tarıhty ózgertip, tas-talqan bolǵan taǵdyrlardy qalpyna keltire almaımyz», - dedi ol.
О́lgenderge qaıta ómir berý de múmkin emestigin aıtqan Abaev, qurban bolǵandar urpaǵynyń bolashaq urpaq aldyndaǵy paryzy - jazyqsyz sottalǵandardyń jarqyn beınesin saqtaý ekenin basa aıtty.
«Jańadan qurylǵan organnyń mıssııasy - saıası qýǵyn-súrgin qurbandaryn tolyqtaı saıası jáne zańdy túrde aqtaý maqsatynda júıeli jumystardy uıymdastyrý. Prezıdenttiń komıssııa aldyna qoıǵan mindetteri jáne onyń aıasynda júrgiziletin jumystar mynadaı:
- Jappaı saıası qýǵyn-súrgin qurbandaryn aqtaý týraly zańnamalyq usynystar ázirleý;
- Jappaı saıası qýǵyn-súrgin qurbanyna teńestiriletin jáne saıası aqtaýǵa jatatyn tulǵalar sanatyn bekitý;
- Aqtalǵandardy jerlengen jerlerin izdeý jáne ol oryndardy kútip-ustaýdy retke keltirý boıynsha usynystar ázirleý;
- Aqtalǵandardyń quqyqtaryn qalpyna keltirý máseleleri boıynsha ótinimder men shaǵymdardy qaraý. Atalǵan mindetter memlekettik komıssııa jumysy sulbasyn naqty beıneleıdi. Onyń barysy jaıynda halyqqa turaqty aqparat berilip otyrady», - dedi Dáýren Abaev.
Eske salaıyq, búgin memleket basshysy Qasym-Jomart Toqaev saıası qýǵyn-súrgin qurbandaryn aqtaý úshin arnaıy memlekettik komıssııa qurýdy tapsyrǵan bolatyn.
