Halyqaralyq balalar kúni qarsańynda «Nazarbaev Zııatkerlik mektepteri» derbes bilim berý uıymynyń fılıaly «Nur-Sultan qalasyndaǵy Halyqaralyq mekteptiń» 7 «S» synyp oqýshylary bul merekeni ózgeshe atap ótýdi uıǵardy. Oqýshylar otbasymen birge aq qaǵazǵa arman-tilekterin jazyp, áýe sharymen birge kók aspanǵa ushyrdy. Balalardyń bul oıyna qoldaý bildirgen ata-analar da qııaldaryna erik berip, balalyq shaqqa saıahat jasady. Buǵan deıin túrli naýqandar men oıyndar áldeneshe ret uıymdastyrylǵanymen, bul jolǵy sharanyń máni bólek. Osylaısha, balalardyń arman-tilekterin arqalaǵan júzdegen áýe shary kókke kóterilip, aspanda qalyqtady.
– Bıyl búkil álemdi sharpyǵan qaýipti indet ómirimizge kóp ózgeris ákeldi. Mektepti qashyqtan oqý formatynda aıaqtap, sońǵy qońyraý sharasyna onlaın qatystyq. Biraq búgin asyǵa kútken merekemiz balalar kúnin osyndaı sıpatta atap ótýdi durys dep sheshtik. Eń bastysy, otbasymyzben, jaqyndarymyzben birge bolý emes pe?! Qaz qatar otyryp, tilekterimizdi qaǵazǵa túsirdik. Elimizdiń qarqyndy damyp, qanat jaıýyn beıneleıtin áýe sharlaryna armandarymyzdy baılap, aspanǵa ushyrdyq. Karantın shyn baqytty ata-analarymyz ben baýyrlarymyz, eń jaqyn adamdarymyz quraıtynyn uǵyndyrdy. Osy ıdeıamyzdy júzege asyrýǵa jetekshilik etken ustazymyz Indıra Ahmetovaǵa alǵys bildiremiz, – deıdi balalar.
Otbasymen dóńgelene sap túzesken oqýshylardyń kóńil-kúıinen ózgeshe merekelik lep eskendeı boldy. Qoldaryna ustaǵan túrli-tústi shardy qalyqtatyp aspanǵa qoıa bergende, elorda aspanynda ushqan sharlar kóz ushynan buldyrap baryp, saǵymǵa aınaldy.
– Bul kúndi osyndaı sıpatta atap ótýdi balalardyń ózderi qalady. Olar sharlary neǵurlym bıikke kóterilse, armandary soǵurlym tezirek oryndalatynyna kámil senedi. Bala armanyna qanat bitirip, ómirdiń eń baqytty kezeńin esterinde qaldyrý – bizdiń paryzymyz, – deıdi qazaq tili men ádebıeti pániniń muǵalimi Indıra Ahmetova.
