Aqtaýda 68 jastaǵy naýqasqa Mańǵystaý oblystyq aýrýhanasynyń angıografııalyq zerthanasynda «CRT-D» ımplantasııasy boıynsha ota jasaldy. Operasııany Nur-Sultan qalasynan arnaıy kelgen «Qazaq arıtmologter qoǵamy» RQB prezıdenti, medısına ǵylymdarynyń doktory, «Ulttyq ǵylymı kardıohırýrgııalyq ortalyǵy» AQ arıtmologııalyq ıntervensııalyq bólimshesiniń meńgerýshisi Aıan Ábdirahmanov jasady.
Aqtaý qalasynyń 68 jastaǵy zeınetker turǵyny kenetten ózin jaısyz sezinip, oblystyq aýrýhanaǵa túsedi. Naýqastyń qan tamyryn tekserip, barlyq tıisti synamalary alynǵan soń mán-jaıdy uǵynǵan jergilikti dárigerler Nur-Sultan shaharyndaǵy Ulttyq ǵylymı kardıologııa ortalyǵynyń mamandarymen baılanysqa shyǵyp, shuǵyl túrde ota jasaý qajet degen sheshimge keledi. Buǵan deıin de birneshe ret sıfrly úsh kameraly CRT-D kardıoverter-defıbrıllıator boıynsha júrek terapııasyna baılanysty kúrdeli otalar jasaǵan bilikti maman Aıan Súleımenuly ótinishti jerde qaldyrmaı, Aqtaýǵa kelýge birden kelisim beredi.
– Naýqastyń júreginiń aıdaý kúshi óte tómengi deńgeıge túsip ketken, naqty aıtqanda 31 paıyzǵa deıin tómendegen, al ol kem degende 60 paıyzǵa deıin bolýy kerek, qarap otyrsaq eki esege túsip ketkenin baıqap otyrmyz, ıaǵnı bul rette otasyz bolmady, – deıdi A.Ábdirahmanov.
Búginde júrek aýrýyna shaldyqqan naýqastar ońtaıly dárilik terapııaǵa qaraǵanda ólim-jitimdi áldeqaıda tómendetetin jáne júrektiń kenetten toqtaýynyń aldyn alýdyń birden-bir tıimdi ádisine júginedi. Ol úshin qarjysyn aıamaı shetel asyp júrgenderi de az emes.
Mańǵystaý oblystyq aýrýhanasynyń angıografııalyq zerthanasynyń bólim meńgerýshisi Qaırat Tóleptiń aıtýynsha, sońǵy 10-12 jylda júrekke ota jasaý kezinde túrli ádisti qoldaný boıynsha elimiz aldyńǵy lekte, ıaǵnı dárigerler ashyq júrekke, tamyrǵa, qulaqshaǵa jáne ózge de kúrdeli otalardy jasaýda. Iаǵnı naýqastarǵa burynǵydaı shetelge barýdyń qajettigi joq, barlyq kúrdeli ota elimizde jasalady. Mysaly, ótken jyly Mańǵystaý oblystyq aýrýhanasynyń kar-dıohırýrgııa ortalyǵynda 1500-den astam naýqasqa ota jasalǵan.
– Adam uıyqtap jatyp kózin ashpaı ólip ketýi múmkin, munyń sebebi júrektiń durys soqpaýynan nemese toqtap qalýynan bolyp jatady. Bul rette júrektiń elektr shıratqyshyndaǵy defıbrıllıator avtomatty túrde qosylyp, álsiz júrekti qaıta iske qosady. Iаǵnı, júrektiń durys jumys isteýin qadaǵalaıdy. Bıyldyń ózinde Mańǵystaý óńirinde 20 adam osyndaı joldy tańdap, «CRT-D» ımplantasııasy boıynsha ota jasatýǵa kelisim berdi, – deıdi Qaırat Tólep.
Qazir júrek soǵysy qalypty emes naýqastar kóp, olardyń júrek arıtmııasy qalypty jumys istemese, júrektiń kenetten toqtaýyna ákep soǵýy múmkin. Sol sebepti osyndaı zamanaýı elektrondy qurylǵyny qondyrýǵa kelisim beretinder kóbeıgen, ıaǵnı júrek qaǵysyn baqylap otyrýǵa arnalǵan kúrdeli kompıýter ispettes qondyrǵyǵa suranys artqan.
Bul qurylǵy óz jumysyn bir sátke toqtatpaı, júrek qyzmetin qadaǵalap otyrady. Dárigerlerdiń aıtýynsha, defıbrıllıator bar bolsa, ýaıymdaýǵa negiz joq, qurylǵy júrek qaǵysynyń buzylýyn anyqtap, qajet kezde elektrrazrıad arqyly qalypty jaǵdaıǵa túsiredi eken.
Otanyń ońaıy joq, áıtse de bul otany júrekke jasalatyn otalardyń eń qıyn túri deýge bolady. Sebebi bul elektrondy qurylǵyny qondyrýdyń arnaıy baǵdarlamasy bar. Al ony engizý úshin úlken tájirıbe kerek. Qondyrǵy júregi aýyratyn naýqastarǵa aýadaı qajet, júrek soǵysy buzylsa, medısınalyq kórsetkishterden soń ony qondyryp, adamnyń ómirin aman alyp qalýǵa bolady. Negizinen, bul qurylǵyny qondyra alatyn bilikti dárigerler ázirge Almaty jáne Nur-Sultan qalalarynda ǵana bar. Mańǵystaý óńirinde ózdiginen júrekke qondyrǵyny qoıatyn dáriger joq, biraq osyndaı bilikti mamandardy shaqyrtyp, olardan tálim alý arqyly úırenýge múmkindik berilip otyr.
Ota sátti aıaqtalyp, ómiri qaıta jalǵanǵan naýqas ta, bilikti mamannan tájirıbe men taǵylym alǵan jáne naýqasqa ómir syılaýǵa sebepshi bolǵan dárigerler de máz.
Mańǵystaý oblysy
