«Álemdik tájirıbege saı e-GOV portalynda koronavırýs juqtyrǵandardyń mobıldi kartasy ázirlengen bolatyn. Ol karta arqyly koronavırýs juqtyrǵan nemese naýqastarmen baılanysta bolǵan azamattardyń jergilikti jerin kórýge bolady», - dedi Oljas Ábishev.
Vıse-mınıstrdiń aıtýynsha, ondaǵy málimetter kún saıyn jańartylyp otyrady.
«Koronavırýs týraly resmı aqparat taratatyn saıt pen kartadaǵy kórsetkishterge baılanysty halyq arasynda túsinispeýshilikter bolyp jatyr eken. О́ıtkeni bizge kelip túsetin suraqtardyń kóbisi osyǵan baılanysty. Resmı saıttaǵy aýyrǵandar sany 11 myń dep kórsetilgenimen onyń barlyǵy naýqas emes. Onyń jartysy indetten emdelip, aýrýhanadan shyǵaryldy. Al qalǵany sáıkesinshe, aýrýhanalarda em qabyldaýda. Elektrondy úkimet saıtyndaǵy kartada biz bul barlyq naýqastardyń sanyn kórsetpeımiz. Onda tek dál qazir aýyryp jatqan naýqastar ǵana kórsetilgen», - dedi ol.
Onyń aıtýynsha, qazir elimizde koronavırýs indetimen aýyryp jatqan 5000-nan asa naýqas bar. Onyń jartysy aýrýhanada bolsa, qalǵany úı karantıninde.
