О́z sózinde QMG basshysy elimizde táýelsizdik jyldary munaı jáne gaz tasymalynyń myqty ınfraqurylymy qalyptasqanyn atap ótti.
– Infraqurylymdy damytý kezeńinde «QazTransGaz» AQ men «QazTransOıl» AQ-nyń «QazMunaıGa»z quramynda bolýy tolyǵymen oryndy edi. Tasymaldaý baǵyttarynyń dıversıfıkasııalanǵan jelisin damytý úshin barlyq resýrstardy biryńǵaı ortalyqqa biriktirý qajet bolatyn. Qazirgi ýaqytqa deıin atalǵan jumystardyń barlyǵy derlik aıaqtaldy jáne aıtylyp otyrǵan qos kompanııa óz aldyna derbes bolyp qalyptasty. Osyǵan baılanysty alǵashqy kezeńde «QazTransGaz» kompanııasyn «Samuryq-Qazyna» qoryna tikeleı baǵynyshty etý usynylady. Bul basqarý deńgeılerin azaıtýǵa, QMG IPO-ǵa shyqqan jaǵdaıda ınfraqurylymdyq jobalardy memleket enshisinde saqtaýǵa, al QMG ózine munaı jáne gazdy barlaý, óndirý jáne óńdeýge, sondaı-aq munaı-gaz hımııasy jobalaryna aıryqsha den qoıýǵa múmkindik beredi, dedi Alık Aıdarbaev.
Nursultan Nazarbaev atalǵan usynysty qoldap, bul máseleni pysyqtaýdy tapsyrdy.
Qazirgi ýaqytta QMG «QazTransGaz» AQ-ǵa qatysty tapsyrmany oryndaýǵa kiristi. Memlekettik organdardyń, «Samuryq-Qazyna» qory men QMG dırektorlar keńesteriniń tıisti kelisimin alý qajet.
Sondaı-aq QMG-nyń kelisimsharttyq qatynastary bar múddeli taraptarmen de kelissóz júrgiziletin bolady. Kredıtorlardyń, sonyń ishinde QMG Eýrooblıgasııalaryn ustaýshylardyń kelisimin alý úshin olarǵa mámileniń mán-jaıy men jasaý sebepterin túsindirý maqsatynda tıisti jumystar júrgiziledi. Mámileniń qurylymy boıynsha sheshim barlyq taraptardyń múddeleri men QMG-nyń kredıttik reıtıngine yqpaly eskerilip qabyldanady.
«QazTransOıl» AQ-ǵa qatysty másele budan keıingi kezeńde qosymsha qaralatyn bolady.
Mańǵystaý oblysy
