Qaraǵandy oblysy Saran qalasyndaǵy burynǵy rezına tehnıka buıymdarynyń zaýyty bazasynda iri ónerkásip jobalaryn iske asyrý máseleleri qaraldy.
Atap aıtqanda, «Yutong» markaly avtobýstar men arnaıy tehnıkany qurastyrýdy uıymdastyrý josparlanǵan. Jobaǵa salynatyn ınvestısııa kólemi 22 mlrd teńgeni quraıdy, kásiporynnyń jobalyq qýattylyǵy — jylyna 1 200 avtobýs jáne 500 birlik arnaıy tehnıka men arnaıy kólik.
Sonymen qosa, «Doublestar» markaly avtomobıl dóńgelegin óndirý jolǵa qoıylady. Jobaǵa 56 mlrd teńge ınvestısııa salyp, jyl saıyn jeńil kólik úshin 3 mln dóńgelek jáne kommersııalyq tehnıka úshin 500 myń dóńgelek shyǵarý kózdelgen.
Sonymen qatar, rezına tehnıkasy zaýyty alańynda daıyn óndiristik ǵımarattar kesheni (Ready Built Factory) qurylady, onda shaǵyn kásipkerler ındýstrııalyq jobalardy, onyń ishinde quraýshy bólshekter men komponentterdi ótkizetin bolady.
Otyrysqa qatysýshylar sonymen qatar Soltústik Qazaqstan jáne Qostanaı oblystarynyń agroholdıngteriniń ınvestorlaryna memlekettik qoldaý kórsetý, 2016-2020 jyldarǵa arnalǵan Jekeshelendirýdiń keshendi josparyn iske asyrý, óńdeý ónerkásibi kásiporyndarynyń qyzmeti jáne t.b. máselelerdi qarastyrdy.
