Aqmola óńirinde kıim tigetin 13 jeńil ónerkásip bar. Conyń biri – «AielBrend» atelesi. Ateleniń tikken kıimderiniń sapasy kóńilge qonymdy, baǵasy qoljetimdi. Uıymdastyrýshysy Dınaranyń mamandyǵy qarjyger. Bank salasynda tek esep-qısappen aınalysqan ol jarty jyl buryn bala kúngi armanyn júzege asyrmaq bolypty. Osylaısha, kásipkerlikke bet burǵan.
– Eń aldymen bıznes joba ázirledim. Arnaıy kýrsyn oqydym. Keıin «Damý» qoryna kómek surap bardym. Maǵan «Bıznestiń jol kartasy» baǵdarlamasy aıasynda 2 mıllıon teńge grant rásimdedi. Qajetti qural-jabdyǵymdy, shıkizattardy aldym da, isimdi bastap kettim, – deıdi jas kásipker Dınara Smaǵulova.
Dınaranyń ózi ári dızaıner, ári kıim úlgisin pishedi. Janynda 2 tiginshisi bar. Elimizdegi barlyq jeńil ónerkásip salasyndaǵy problema onyń da basynda bar. Ol – shıkizattyń syrttan ımporttalýy jáne ónimderin sertıfıkattaýda qıyndyqtar bar.
– Biz tender utysyna qatysqymyz keledi. О́kinishke qaraı, taýardy sertıfıkattaý máselesinde qıyndyqtarǵa jolyǵyp otyrmyz. Shıkizat qymbatqa túsedi. Qazaqstanda sándi kıim matasy óndirilmeıdi. Omsk, Máskeý, Almaty, Qytaıdan matalardy tapsyryspen aldyrtamyz, – deıdi jas kásipker Dınara Smaǵulova.
Karantın kezinde kásip toqtamaǵan, jańa formatta jumys istegen. Tapsyrys berýshilerdiń dene ólshemin onlaın qabyldap, kıim tikken. Jolǵa qoıylǵan marketıngtiń arqasynda az ýaqyttyń ishinde turaqty klıentter bazasyn qalyptastyrǵan.
Kókshetaý qalasy
