Oblys ortalyǵyndaǵy birqatar saýda oryndarynda qazir ekopaket tegin taratylýda. Bul jańalyq, ıaǵnı tabıǵı taza qaptama sońǵy jyldary jaýlap alǵan polıetılen ónimderge balama bolmaq. Negizinde qaǵaz qapshyq tabıǵatqa zııanyn tıgizbeýimen birge, azyq-túlik taýarlaryn uzaq ýaqyt saqtaýǵa qolaıly eken.
Jalpy ekopaket qorshaǵan ortaǵa qamqor bolǵysy kelgen tutynýshylardyń tańdaýy desek te bolar. Kókshetaýlyq bastamashyl jastar ekopaket óndirisin qolǵa alyp otyr. Ras, birshama kúrdeli is ári shıkizaty sál qymbattaý. Esesine polıetılen qaptama tárizdi tabıǵatqa zııany joq. Osy jaǵynan utymdy.
Jas kásipkerler óndiristik jelini ózge de qaptama túrlerin óndirýge beıimdemek. Azyq-túlik qana emes, sement, aǵash kómiri tárizdi keıbir qurǵaq ónimder de qaǵaz qaptamamen qaptalady. Ázirge ónimniń quny qaptama syrtyndaǵy jarnamadan túsetin tıyn-tebennen aqtalýda. Bir aıta keterligi, qaptama qoldanylatyn jelim men boıaýdyń da zııansyz ekendigi.
– Qaptamaǵa jarnama jazǵan kezde tabıǵı, taza boıaýlar qoldanylady. О́ıtkeni, bul qaptamalarmen azyq-túlik taýarlary oralady ǵoı. Qaǵaz qaptamada oralǵan zattar áldeqaıda uzaq saqtalady, – deıdi «Ekopaket» jobasynyń menedjeri Rysbek О́mirǵalıev.
Qaǵaz qaptama tańsyq emes, keshegi ıt basyna irkit tógilgen keńes zamanynda da osyndaı qaptamalardy kóz kórgen. Al polıetılen paket toqsanynshy jyldardyń orta sheninde naryqqa shymshymdap enip, keıin jaýlap aldy. Endigi arada týǵan tabıǵatymyzdyń baǵzy beınesin saqtap qalǵymyz kelse, zııansyzyna umtylǵanymyz durys shyǵar.
Aqmola oblysy
