Qazaqstandyq volonterlardy Nursultan Nazarbaevtyń atynan marapattady

Qazaqstan • 11 Maýsym, 2020

Eriktiler Elbasynyń alǵys hatyn aldy

"Nur Otan" partııasynyń Ortalyq apparatynda koronavırýspen kúres jaǵdaıynda muqtaj azamattarǵa qoldaý kórsetý boıynsha "Biz Birgemiz" respýblıkalyq aksııasyna qatysqan eń belsendi volonterlar elimizdiń Tuńǵysh Prezıdenti Nursultan Nazarbaevtyń atynan alǵys hattarmen marapattaldy. Bul týraly "Nur Otan" partııasynyń baspasóz qyzmetine silteme jasaı otyryp Egemen.kz habarlaıdy.

Jibek AǴDARI

Taıaýda bıleýshi partııanyń Lıderi qazaqstandyq árbir volonterǵa óz yqylasyn bildirip, alǵys hattarǵa qol qoıǵan edi.

"Tótenshe jaǵdaı kezinde "Jas Otan" búkil el boıynsha bes myńnan astam eriktini jumyldyrdy. Olar demalyssyz jumys istep, muqtaj adamdarǵa kómek jetkizdi. Naǵyz patrıottardyń, jaýapkershiligi mol jas kóshbasshylardyń jańa býyny qalyptasqany qýantady. Olardyń eń belsendilerine arnalǵan alǵys hattarǵa qol qoıdym", - dedi Nursultan Nazarbaev.

Saltanatty shara barysynda "Nur Otan" partııasy Tóraǵasynyń Birinshi orynbasary Baýyrjan Baıbek "Jas Otan" jastar qanatynyń volonterlary búkil el boıynsha 250 myńnan astam otbasyǵa azyq-túlik sebetterin, maskalar men eń qajetti zattardy jetkizip bergenin atap ótti. Jasotandyqtar alǵashqylardyń qatarynda Maqtaaral aýdanyna attanyp, qazirgi kezde 500-den asa jas sý basýdan zardap shekken aýyl turǵyndaryna aqysyz kómek kórsetýdi jalǵastyryp jatyr.

"О́zderińiz biletindeı, Elbasynyń bastamasymen "Nur Otan" partııasy Memleket basshysynyń qolǵa alǵan daǵdarysqa qarsy sharalaryna qosymsha muqtaj qazaqstandyqtarǵa qarqyndy kómek kórsetip jatyr. Nursultan Nazarbaevtyń bastamasymen qurylǵan "Birgemiz" qorynyń jelisi boıynsha mesenattardyń qoldaýymen 470 myńnan astam otbasy 50 myń teńgeden birjolǵy tólemaqy aldy. Tuńǵysh Prezıdent Qorymen birge asa muqtaj otbasylarǵa ataýly qoldaý kórsetý uıymdastyryldy. Osynaý jumystardy atqarýda volonterlarymyzdyń róli zor boldy. Bul rette 2019 jyldy Nursultan Ábishuly "Jastar jyly" dep atasa, al 2020 jyldy el Prezıdenti Qasym-Jomart Kemeluly Toqaevtyń "Volonter jyly" dep jarııalaýy sımvoldyq mánge ıe boldy. Sizder óz otanshyldyqtaryńyzdy, azamattyq pen janashyrlyqtaryńyzdy tanyta otyryp, búkil qazaqstandyq jastarǵa úlgi kórsettińizder", - dedi Baýyrjan Baıbek.

Sonymen birge Tóraǵanyń Birinshi orynbasary jastardy aldaǵy partrııaishilik tańdaý – praımerızge qatysýǵa shaqyrdy.

"О́tken aptada partııa Lıderi bıylǵy 17 tamyzdan 3 qazanǵa deıingi aralyqta Praımerız ótkizý týraly Qaýlyǵa qol qoıdy. Bizdiń maqsatymyz – aldaǵy Májilis pen barlyq deńgeıdegi máslıhattarǵa saılaýlarǵa partııalyq tizimder qalyptastyrý úshin jańa lıderlerdi anyqtaý boıynsha barynsha ashyq ári básekelestik negizde irikteý ótkizý. Bul rette 35 jasqa deıingi jastarǵa – 20%, al áıelder úshin – 30% kvota kózdelgen. Osy arqyly biz daryndy da bastamashyl jastarymyz úshin partııalyq "áleýmettik lıftini" qamtamasyz etpekpiz", – dedi Baýyrjan Baıbek.

Osy aptanyń ishinde Nursultan Nazarbaevtyń atynan alǵys hattarmen úsh myńdaı qazaqstandyqty marapattaý josparlanǵanyn atap ótken jón. Olardyń arasynda partııanyń óńirlik fılıaldarynyń volonterlary men belsendileri, sondaı-aq qaıyrymdy mesenattar bar.

"Tótenshe jaǵdaı rejımi engizilgen kezde kóptegen adamdar qıyn jaǵdaıǵa tap boldy. Meniń olarǵa qandaı da bir kómek bergim keldi. Áleýmettik jelilerden «Nur Otan» partııasy muqtaj azamattarǵa azyq-túlik jetkizip berip jatqanyn jáne bul iske kómek beretin eriktiler qajet ekendigin bilgennen keıin men birden habarlastym. «Biz Birgemiz» sekildi aýqymdy aksııaǵa qatysqanyma sheksiz rızamyn", - dep, volonter Elmıra Aıǵalıeva óz áserimen bólisti.

"Jas Otan" jastar qanaty belsendileriniń biri Sergeı Matıýshenko óz kezeginde Elbasynyń alǵys hatyn alý erekshe mártebe ekenin jáne adamdarǵa kómek kórsetýge qosymsha kúsh-jiger syılaıtynyn atap ótti.

"Elimiz úshin osynaý kúrdeli ýaqytta "Nur Otan" partııasy barsha aqjúrek azamattar men jastardy biriktire otyryp, jurtqa óziniń jaýapkershilikti arqalap, halyqtyń qamyn oılaıtyn saıası kúsh ekendigin kórsete bildi. Aldaǵy praımerız - "Nur Otan"-nyń jastarǵa óz qabiletterin ashýlary úshin naqty jaǵdaı jasap otyrǵanyna taǵy da bir dálel", - dedi ol.