Mańyzdy nysandy Amandyq Batalov merdiger "Bazis Construction" kompanııasynyń basshylyǵymen, mamandarymen birge aralady, aldaǵy ýaqytta atqarylýy tıis jumystardyń egjeı-tegjeıin talqylady. Iri jobada istiń usaq-túıegi bolmaıdy. Sondyqtan oblys basshysy mamandarmen ishki dızaın elementteri, balalar basseınindegi qabyrǵalardyń jazýlary, tús jaǵynan úılesimdiligi, ǵımarattyń ishine de, syrtyna da tý tuǵyryn ornatý, sol sııaqty ǵımaratty jaryqtandyrýdy, turmystyq bólmelerdi jabdyqtaýdy uıymdastyrý, kireberiske tóseletin plıtkalardyń túsi men túri sııaqty máselelerdiń barlyǵyn surap bilip, talqylap, óz usynystaryn aıtty.
Oblys ákimi ǵımarat aýmaǵyn abattandyrý jumysyn qatań synǵa aldy:
Basseın men "Jastar" saıabaǵy, mańyndaǵy kósheler ózara bir-birimen biryńǵaı keshen qurap úılesimdi bolyp turýy kerek. Osy máseleniń bárimen meniń birinshi orynbasarym Lazzat Turlashov, qala ákimi Ǵalymjan Ábdiraıymov, oblystyq qurylys basqarmasy, qalalyq sáýlet jáne basqa da qyzmetter aınalysýy kerek. Bul baǵyttaǵy jumystar óte sylbyr júrip jatyr.
Birqatar máseleler áli kúnge deıin sheshilmegen. Buǵan jol bermeý kerek. Men kelesi kelgende meniń qazirgi jasaǵan túzetýlerimdi, qaıta daıyndalatyn landshaftyq dızaın jobasyn, jalpy abattandyrýdyń egjeı-tegjeıli josparyn kórsetetin bolyńdar. Jaryq shamdarynyń, oryndyqtardyń, shaǵyn arhıtektýralyq formalardyń túrleri - osyndaı detaldardyń barlyǵy da mańyzdy. Osylardyń barlyǵyn oılastyryp, daıyndap, maǵan bekitýge kórsetýleriń kerek. Osy nysanda aptasyna eki ret kezdesý ótkizip, barlyq máselelerdi sheshýdi, jumysty jandandyrýdy tapsyramyn. Eki aptada bir ret kelip, kórip turatyn bolamyn, tamyzda nysandy paıdalanýǵa berýimiz kerek. Oǵan qosa árbir dúısenbi saıyn jumystardyń barysy, ásirese, abattandyrý týraly esep berip otyrasyńdar, - dedi A.Batalov.
Oblys ákimi sport nysanyn aldaǵy ýaqyttaǵy iske qosý kezindegi máselelerdi de talqylady.
- Júzýden túrli deńgeıdegi jarystardan ózge bul jerde balalardy, jalpy turǵyndardy júzýge úıretedi, sý dobynan, mánerlep júzýden, sýǵa sekirýden jarystar ótetin bolady. Sondyqtan kúrdeli qural-jabdyqtardy ornatyp, onyń qyr-syryn jaqsy biletin mamandar budan bylaı da osynda jumys istese jaqsy bolar edi. Biz óz tarapymyzdan aldaǵy ýaqytta olardyń turmystyq máselelerin sheshýge járdemdesetin bolamyz, - degen oblys ákimi oblystyq sport basqarmasynyń basshysyna merdiger mekememen birlesip kadrlyq máseleni keńinen oılastyrýdy tapsyrdy.
"Bazis Construction" merdiger kompanııasynyń atqarýshy dırektory Mustafa Afraılovtyń aıtýynsha, jalpy qurylystyń birinshi kezeńi aıaqtalýǵa jaqyn. Ekinshi kezeńi iske qosý jumystaryn qamtamasyz etý úshin, basseınderdi tekserý, sýǵa toltyrý, sýdy jylytý men jeldetý sapasyn tekserý úshin qajet. Barlyq qajetti ıtalııalyq, germanııalyq qural-jabdyqtar jetkizilip, ornatýǵa daıyn tur. Qazirgi kezde ishki árleý jumystary júrip jatyr. Aldaǵy aptadan bastap kompanııa abattandyrý jumystaryna kirisedi. Nysandaǵy jumystarǵa 475 adam tartylǵan, shatyrdyń ózinde 75 adam jumys istep jatyr.
Amandyq Batalov kelesi aptanyń sońyna deıin abattandyrýǵa qatysty dızaın jobasyn kórsetýdi tapsyrdy. Sol sııaqty qurylys jumystaryn belgilengen merzimde aıaqtap, qyrkúıekte iske qosý tapsyryldy.
Eske salatyn bolsaq, jalpy alańy myń sharshy metr bolatyn, sý sporty túrine arnalǵan nysan bazasynda álemdik standarttarǵa sáıkes 2 basseın bar. Uzyndyǵy 50 metrlik basseınderdiń biri júzý, akvaaerobıka, sý doby, mánerlep júzý boıynsha oqý-jattyǵý sabaqtaryna arnalsa, ekinshisi 5-ten 10 metrge deıingi bıiktikten sýǵa sekirýge arnalǵan.
