Baspasóz qyzmetiniń habarlaýynsha, Aq úı basshysy Prezıdent Q.Toqaevty el prezıdenti bolyp saılanǵan bir jyldyq mereıtoıymen quttyqtady. Amerıkalyq kóshbasshy Memleket basshysynyń bastamasy boıynsha júrgizilip jatqan reformalar týraly jáne ekijaqty strategııalyq seriktestikti odan ári nyǵaıtýǵa nıetti ekenin málimdedi.
"Sizdiń saıası jańarýǵa baǵyttalǵan salıqaly reformalaryńyz maqtaýǵa turarlyq. AQSh halqy da Sizdiń memleket senimin arttyrý jolyndaǵy órkendeýge degen naqty qadamdaryńyzdy jáne serpindi qoǵamnyń negizi bolyp tabylatyn maqsattaryńyzdy qoldaıdy. Keńeıtilgen strategııalyq seriktestiktiń bir bóligi retinde Sizdermen osy bastamalar boıynsha yntymaqtasýǵa daıynbyz", deıdi Tramp óziniń jedelhatynda.
Amerıka Qurama Shtattarynyń Prezıdenti Amerıka halqy atynan Prezıdent Q.Toqaevqa aldaǵy kezeńde Qazaqstanda beıbitshilikti nyǵaıtýǵa, órkendeý men qaýipsizdikti qamtamasyz etýge baǵyttalǵan is-sharalarǵa sáttilik tiledi.
"Sondaı-aq sizderdiń COVID-19 taralyp ketýin boldyrmaý jónindegi batyl is-áreketterińizdi atap ótkim keledi. Biz pandemııadan jáne odan keıingi kezeńde ekonomıkany qalpyna keltirýge baǵyttalǵan birlesken kúsh-jigerimizdi jalǵastyramyz", delingen jedelhatta.
Sonymen qatar AQSh Prezıdenti Qazaqstan basshysyna myqty densaýlyq, jumysyna tolaǵaı tabys tiledi.
